Rriten përsëri bonot e thesarit, sidomos ato me afat maturimi 3 mujor – Kërkesë shumë e lartë e qeverisë për borxh!

Ankandi i radhës së bonove të thesarit ka shënuar tjetër rritje të fortë të normave të interesit, veçanërisht të atyre me afat maturimi 3 mujor. Nga 1.9% në anakandin e mesit të gushtit, këtë të martë yieldi mesatar i ponderuar i tyre u rrit në 2.78%. ndërkohë që rritje kanë vijuar të shënojnë edhe yieldet e bonove të thesarit me afat maturimi 12 mujor.

Yieldi  Mesatar i Ponderuar i bonove të thesarit me afat maturimi 12 mujor arriti nivelin 4.53% një javë më parë, për t’u ngjitur në 4.74% këtë të martë. Për të kuptuar sa e fortë është rritja mjafton të sjellim në vëmendje se në ankandet e korrikut yield-i mesatar i bonove me afat maturimi 12-mujor ishte 2.84%.

Kërkesa për borxh nga ana e Qeverisë ka qenë shumë e lartë edhe këtë javë, madje prej ankandit nuk është siguruar dot shuma fillestare e kërkuar. Shuma e kërkuar nga Qeveria përmes bonove me afat maturimi 3 mujor ishte 1,2 miliardë lekë, nga e cila u ble prej investitorëve vetëm 1 miliardë lekë. Ndërsa nga shuma prej 5.5 miliardë lekësh, afërisht 55 milionë dollarë e emetuar në formën e bonove 1 vjeccare, u pranuan vetëm 3.9 miliardë, afërisht 39 milionë dollarë.

Në thelb të yieldeve mjaft të larta të bonove të thesarit qëndron rritja e normës bazë të ineteresit nga ana e Bankës së Shqipërisë, si dhe kërkesa e lartë e Qeverisë për borxh në tregun e brendshëm.

Sipas kalendarit të Emetimeve të Ministrisë së Financave, për të tre muajt e fundit të vitit janë parashikuar nga shtatë ankande, me një vlerë totale prej 83.5 miliardë lekësh, apo afërsisht 830 milionë dollarësh.

Sipas kalendarit, 31 miliardë do të emetohen në tetor, 29 miliardë në nëntor dhe 23.5 miliardë në dhjetor. Ankandet do të dominohen nga emetimet e bonove të thesarit 12 mujore.

Lorenc Rabeta / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.