Rritet kërkesa globale për bateri litiumi – Parashikohet 5-fishim i saj deri në vitin 2030

Kërkesa globale për bateri litium pritet të pesëfishohet deri në vitin 2030, sipas aleancës publike-private Li-Bridge, pasi më shumë njerëz zgjedhin automjetet elektrike dhe sistemet e ruajtjes së energjisë.

Kërkesa për bateri litium në Shtetet e Bashkuara të Amerikës pritet të rritet më shumë se gjashtë herë dhe të përkthehet në 55 miliardë dollarë në vit deri në fund të dekadës, por megjithatë vendi pritet të varet nga importet për furnizim, sipas raportit.

Li-Bridge punon drejt përshpejtimit të zhvillimit të një zinxhiri të fuqishëm furnizimi për bateritë me bazë litium dhe koordinimi drejtohet nga Laboratori Kombëtar Argonne, i cili financohet nga Departamenti i Energjisë i SHBA.

Kërkesa për automjete elektrike është rritur gjatë viteve të fundit, pasi konsumatorët e ndërgjegjshëm për klimën blejnë automjete me motorë elektrikë, kjo dhe për shkak të cmimeve në rritje të karburantit.

Bateritë e litiumit që do të fuqizojnë një sërë automjetesh gjatë viteve të ardhshme do të jenë gjithashtu thelbësore për sistemet ushtarake dhe ato elektronike për konsumatorët. Sipas raportit të Li-Bridge, në kushtet aktuale kompanitë dhe punëtorët amerikanë do të kapin më pak se 30% të vlerës së qelizave të konsumuara brenda vendit.

Mungesa e një zinxhiri të konsiderueshëm të furnizimit të baterive litium në Shtetet e Bashkuara dhe mungesa e aksesit të sigurt në materialet energjetike përbëjnë kërcënim serioz për sigurinë kombëtare dhe ekonomike të SHBA, përfundon raporti.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.