Rritet me 6% paga e personelit shëndetësor në vend – 15 mijë lekë ekstra në muaj për ata që ushtrojnë profesionin e tyre jashtë vendbanimit

Në fjalimin e mbajtur gjatë vendimeve të qeverisë, ministrja e shëndetësisë Ogerta Manastirliu ka folur për rritjen e rrogës që do të përfitojnë punonjësit e personelit shëndetësor në vendin tonë duke nisur nga 1 korriku.

“Politika e rritjes së pagave për personelin shëndetësor duke filluar nga data 1 korrik për të gjithë mjekët, infermierët, teknikët e laboratorit, imazherisë, të gjithë profesionistët e shëndetësisë që ofrojnë shërbime për qytetarët, paga e tyre rritet me 6%. Kjo është një politikë e Qeverisë Shqiptarë e cila sikurse ishte planifikuar për buxhetin e vitit 2022 hyn në fuqi nga data 1 korrik dhe shtrin efektet e saj përgjatë gjithë vitit në vazhdim. Efekti vjetor i rritjes së pagave në masën 6% është në rreth 10 milion dollarë dhe nga kjo rritje përfitojnë rreth 19 mijë mjek, infermierë dhe profesionist shëndetësor që ofrojnë shërbime në gjithë sistemin tonë shëndetësor”, u shpreh ministrja.

“Nga ana tjetër kemi vendosur gjithashtu dhe qeveria shqiptare ka miratuar edhe një shpërblim financiar në masën 15 mijë lekë në muaj për të gjithë ata mjekë të cilët përfundojnë specializimin dhe në bazë të kontratave me MSH ushtrojnë profesionin e tyre jashtë vendbanimit pra në spitalet rajonale do të përfitojnë këtë shpërblim financiar mbi pagën dhe kjo do të hyjë menjëherë në fuqi me miratimin nga qeveria, dhe do të përfitojnë rreth 300 mjekë,” shtoi Manastirliu.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.