Rritje me 2.2% e ekonomisë botërore – Parashikimet e Citigroup, inflacioni global mbetet në nivelin 7%

Një ulje më pak e pjerrët parashikohet për ekonominë globale nga ekonomistët e Citigroup, të cilët tani po përmirësojnë pak parashikimet e tyre të rritjes. Megjithatë, ata vlerësojnë sërish se ritmi i rritjes së PBB-së globale këtë vit do të jetë më i ulëti në 40 vitet e fundit. Në veçanti, ata parashikojnë se këtë vit ekonomia globale do të ngadalësohet në një normë rritjeje prej 2.2%, pra 0.25% më e lartë se sa parashikonin në vlerësimin e tyre të mëparshëm. Arsyeja është se shifrat makroekonomike globale duket se janë duke u përmirësuar.

Ata sqaruan gjithashtu se një faktor vendimtar për vlerësimin në rritje të parashikimeve të tyre ishte fakti se imazhi i ekonomisë së Kinës po përmirësohet, ekonomia amerikane po tregon elasticitet, ndërkohë që Eurozona duket se po hyn në stanjacion, por jo në recesion.

Megjithatë, grupi bankar thekson se inflacioni i lartë i vazhdueshëm në nivel global mund të kufizojë rritjen. Siç thekson ai, bazuar në vlerësimet e tyre, inflacioni në mbarë botën është ende në nivele rreth 6% deri në 7%, pra shumë mbi objektivat zyrtarë të bankave qendrore.

Vlerësimet e Citigroup kryesisht i bëjnë jehonë pikëpamjeve të shprehura javën e kaluar si nga Banka e Amerikës ashtu edhe nga Goldman Sachs, kur ata parashikuan se Rezerva Federale do të detyrohej të rriste normat e interesit të dollarit edhe tre herë këtë vit dhe të arrinte mbi 5%.

Duhet theksuar se stoqet amerikane shënuan një rritje të ndjeshme në fillim të vitit, pas rënies së gjerë të vitit 2022, dhe kjo për shkak se në tregje mbizotëronte vlerësimi se inflacioni tashmë kishte arritur kulmin dhe ishte në rrugën e ngadalësimit, për këtë arsye nuk do të regjistrohej rritje agresive e normave të interesit.

Megjithatë, pas të dhënave më të fundit makroekonomike, të cilat tregojnë se inflacioni mbetet bindshëm i lartë, bankat qendrore u kanë sinjalizuar tregjeve se rritje të mëtejshme të normave të interesit janë të pashmangshme. Dhe siç theksuan ekonomistët e Citigroup, gjithçka vërteton faktin se rritja e normave të interesit do të fillojë të bëhet e dhimbshme këtë vit.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.