Rritje page 7% për 50 mijë zyrtarë në Bruksel – Aktualisht, Von der Leyen fiton 1 mijë euro në ditë

Një cmenduri e re pagash në Bruksel. Kështu e komentojnë mediat faktin se 50 mijë zyrtarë në Bashkimin Evropian tashmë po përfitojnë rritjen e dytë të pagave në 6 muaj: pagat e tyre janë rritur me 7%.

Pavarësisht se zyrtarët e Bashkimit Evropian aktualisht kanë një pagë të konsiderueshme, ekziston një rregullator automatik si pasojë e shtrenjtimit të kostos së jetesës. Për këtë arsye, pagat u rritën me 2.4% në janar të vitit 2022.

Paga bazë e presidentes së komisionit të Bashkimit Evropian, Ursula von der Leyen, u rrit me 2044 euro në krahasim me vitin 2021. Për herë të parë paga për këtë post është mbi 30 mijë euro pasi ajo paguhet 31.250 euro në muaj.

Sipas raportimeve të medias gjermane Bild, ajo fiton 1 mijë euro në ditë dhe së bashku me kompensimin për udhëtime jashtë vendit, paga e saj mujore do të arrijë në 36 mijë euro. Nga ana e tyre, komisionerët e BE -së do të marrin 1667 euro shtesë mbi pagën e tyre prej 25 475 euro.

Në të njëjtën kohë, pagat e 705 eurodeputetëve do të rriten me gati 700 euro, duke arritur në 10.495 euro në muaj dhe për herë të parë do të tejkalojnë 10 mijë euro.

Por nëpunësit civilë të Parlamentit Europian do të kenë edhe bonus. Paga bazë më e ulët e një punonjësi në Parlamentin Evropian do të rritet me 214 euro, duke arritur në 3 272 euro dhe më e larta me 1 483 euro duke arritur në 22 646 euro.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.