Rusia pranon të zgjasë marrëveshjen e grurit të Detit të Zi!

Sekretari i Përgjithshëm i OKB-së Antonio Guterres konfirmoi të enjten se të gjitha palët kishin rënë dakord për të zgjatur marrëveshjen e ndërmjetësuar nga OKB për Drithërat e Detit të Zi që synon lehtësimin e një krize globale ushqimore pasi Rusia kishte hedhur dyshime mbi pjesëmarrjen e saj të vazhdueshme në marrëveshje.

“Unë mirëpres marrëveshjen e të gjitha palëve për të vazhduar Iniciativën e Drithërave të Detit të Zi për të lehtësuar lundrimin e sigurt të eksportit të drithit, produkteve ushqimore dhe plehrave nga Ukraina”, tha Guterres në Twitter. “Iniciativa tregon rëndësinë e diplomacisë diskrete në gjetjen e zgjidhjeve shumëpalëshe.”

Marrëveshja, e nënshkruar në korrik, do të skadonte të shtunën. Në një postim në Twitter, ministri ukrainas i Infrastrukturës Oleksandr Kubrakov tha se marrëveshja do të “zgjatet për 120 ditë”.

Ministri i Jashtëm rus Sergej Lavrov hodhi të martën dyshime mbi të ardhmen e marrëveshjes, duke thënë se ajo varej nga përmbushja e kushteve ekzistuese. Në fillim të këtij muaji, Rusia iu bashkua sërish marrëveshjes pasi tha se po tërhiqej.

Ukraina dhe Rusia së bashku përbëjnë gati një të tretën e eksporteve globale të grurit dhe marrëveshja e grurit ka luajtur një rol vendimtar në uljen e çmimit të grurit dhe të mallrave të tjera globalisht.

Edel Strazimiri / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.