Sa kushtojnë protestat e fermerëve? – Ekonomia e Eurozonës do të vijojë të jetë e dobët

Protestat e fermerëve vazhdojnë në shumë vende të Europës si Greqi, Gjermani, Itali, Francë, Rumani, Holandë dhe Belgjikë. Por sa mund të kushtojë situata e krijuar? Historia e protestave aktuale mund të gjurmohet në Marrëveshjen e Gjelbër në 2019-ën, e cila përfshinte ndryshime të rëndësishme për të arritur neutralitetin klimatik. Qëllimi i marrëveshjes ishte dekarbonizimi dhe dixhitalizimi i ekonomisë së Europës. Ajo sugjeroi disa ndryshime serioze të politikave me një objektiv për të arritur neutralitetin klimatik deri në vitin 2050. Megjithatë, politikëbërësit nuk arritën të përfshijnë atë që quhet të menduarit e rendit të dytë, dmth ndikimin e tij te fermerët. Trazirat e vazhdueshme janë bashkuar me një ngadalësim në të gjitha ekonomitë kryesore të Europës duke krijuar themelet e një megakrize.

Në shumë pjesë të Europës, protestat janë përshkallëzuar në bllokime rrugëshe, duke reflektuar zemërimin për rritjen e çmimeve, pagat e ulëta dhe rregulloret mjedisore të BE-së. Konkurrenca në industrinë ushqimore vendase po e përkeqëson më tej situatën, duke lënë pak shpresa për fermerët. Gjendja e fermerëve nuk lidhet vetëm me masat specifike të politikës shtetërore, por është gjithashtu një përpjekje për të sfiduar rregulloret mjedisore të BE-së dhe vizionin e qëndrueshmërisë në lidhje me kohët e ardhshme.

Fermerët në Gjermani po protestojnë kundër planit të qeverisë për të shkurtuar subvencionet e naftës; fermerët në Francë po protestojnë kundër rregulloreve të tepërta për aktivitetet e tyre bujqësore; fermerët në Holandë po protestojnë kundër planeve mjedisore të qeverisë, që synojnë reduktimin e numrit të bagëtive për të ulur emetimet. Kjo trazirë ka potencialin që jo vetëm të prishë strukturën bujqësore të rajonit, por edhe të shqetësojë sektorin e transportit përgjegjës për dërgimin e mallrave të ndryshme, duke ndalur kështu zinxhirin e përgjithshëm të furnizimit dhe duke ndikuar në ekonominë rajonale në përgjithësi.

Demonstratat agresive, përplasjet me policinë, mbylljet mbarëkombëtare, bllokimet në rrugë dhe protestat masive do të kenë pasoja të rënda edhe në sektorin e tregtisë dhe prodhimit. Për më tepër, fermerët tani po synojnë zonat portuale me qëllim që të shkaktojnë përçarje në infrastrukturën logjistike, duke ndikuar në aktivitetet portuale. Në verën dhe vjeshtën e vitit të kaluar, Evropës iu desh të përballej me dëme të mëdha në pyje dhe të korra për shkak të përmbytjeve dhe zjarreve. Për rrjedhojë, shumë fermerë humbën bagëtinë dhe të korrat e tyre dhe pësuan humbje të rënda financiare.

Përpara se Europa të kishte shansin të rikuperohej nga pasojat ekonomike, veprimet e fermerëve po i komplikojnë më tej problemet duke rënduar infrastrukturën ekonomike të vendeve individuale dhe duke minimizuar mundësinë e rimëkëmbjes së infrastrukturës bujqësore. Demonstratat kanë potencialin që jo vetëm të shkaktojnë rënien e peizazhit ekonomik kombëtar, por edhe të ndikojnë në ekonominë në nivel të BE-së. Siç thotë BQE: “Ekonomia e eurozonës do të vazhdojë të jetë e dobët në afat të shkurtër, por pritet të rritet më vonë këtë vit.”

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.