Sa na “kushtoi” pastrimi dhe gjelbërimi? – Qytetarët paguan më shumë në 2022-shin
Të ardhurat e bashkive nga shërbimet publike vendore siç pastrimi dhe gjelbërimi, zënë peshën kryesore sa i takon të hyrave totale të mbledhura nga tarifat vendore. Referuar të dhënave të bëra publike në raportin e Institutit të Bashkive të Shqipërisë, të ardhurat nga shërbimet që ofrojnë 61 bashkitë për vitin 2021 rezultojnë të jenë në 43.6 milionë euro, ndërsa në 2022 kanë pësuar një rritje të konsiderueshme në 47.6 milionë euro. E përkthyer në përqindje, rritja rezulton në afro 9.1 për qind.
Të ardhurat nga tarifat e shërbimeve publike përfshijnë menaxhimin e mbetjeve, ndriçim, gjelbërim, furnizimi me ujë dhe kanalizimet, ujitjen dhe kullimin). Ky zë i të ardhurave ka pësuar gjithashtu rritje nga viti në vit. Rreth 88% e të ardhurave nga tarifat për shërbimet publike mblidhen nga tarifa e pastrimit dhe higjienës.
Në tre vitet e fundit, të ardhurat nga tarifa e pastrimit dhe higjienës kanë ndjekur prirje rritëse progresive, në pasqyrim të rritjes së tarifave vendore të aplikuara në disa prej bashkive. Gjithashtu, në të njëjtin drejtim mund të ketë kontribuar mbledhja e kësaj tarife duke përdorur si agjentë tatimorë kompanitë e Ujësjellës Kanalizimeve në zonat urbane kryesisht dhe aty ku ekziston rrjeti i furnizimit me ujë. Të ardhurat nga tarifa e ndriçimit publik përfaqësojnë rreth 7% ndaj totalit nga tarifat e shërbimeve publike.
Të ardhurat nga tarifa për shërbimin e ujitjes dhe të kullimit ndonëse kanë peshë të ulët ndaj totalit të të ardhurave nga tarifat vendore, sërish ka tendencë rritëse për çdo vit. Kjo tarifë mblidhet në masë më të gjerë në bashkitë Elbasan, Berat, Korçë, Lushnjë, Dimal etj, në përputhje dhe me karakterin ekonomik bujqësor të tyre.
Elisabeta Dosku/ SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.