Serbia planifikon pesë ndërlidhje të reja të energjisë me fqinjët- Linja me Shqipërinë, e vetmja që nuk ka nevojë për investime të reja

Serbia mund të marrë pesë ndërlidhje të reja për transmetimin e energjisë elektrike deri në vitin 2035 me Bosnjë dhe Hercegovinën, Bullgarinë, Kroacinë, Hungarinë, Malin e Zi dhe Rumaninë.

Linjat e reja të energjisë do të rrisin kapacitetet e transmetimit veri-jug dhe lindje-perëndim përmes Serbisë dhe do të nxisin shkëmbimin e energjisë me fqinjët, por gjithashtu do të forcojnë sigurinë e furnizimit të vendit.

Projektet në fjalë janë: Korridori Transbalkanik, linja e re e interkonjeksionit 400 kV ndërmjet Serbisë dhe Kroacisë, Korridori Panonian, Korridori i CSE-së Veriore dhe Korridori i Ballkanit Qendror.

Pesë ndërlidhjet janë ndër 141 projektet në Planin e fundit 10-vjeçar Evropian për Zhvillimin e Rrjetit 2022 (TYNDP), i cili është i hapur për konsultim publik deri më 16 shtator. Plani është përgatitur nga Rrjeti Evropian i Operatorëve të Sistemit të Transmisionit për Energjinë Elektrike (ENTSO-E ).

Çdo dy vjet që nga viti 2012, TYNDP përcakton projektet prioritare në nivel evropian që do të zbatohen nga operatorët e sistemit të transmetimit (OST).

Sipas OST të Serbisë, Elektromreža Srbije (EMS), zbatimi i të pesë projekteve pritet para vitit 2035.

Ky hark kohor dhe fakti që investimet në segmentet serbe të këtyre projekteve vlerësohen në 500 milionë euro, krijon një detyrë sfiduese, por të arritshme për EMS, tha kompania.

Hapi i parë sipas procedurës TYNDP është të bëhet një vlerësim i nevojës për rritjen e kapaciteteve transmetuese ndërkufitare dhe të propozohet një rritje kapaciteti krahasuar me situatën ekzistuese. Propozimi duhet të marrë parasysh realizueshmërinë e investimit.

Pothuajse në çdo kufi në rajonin e Evropës Juglindore është propozuar një numër i konsiderueshëm i rritjes së kapacitetit të transmetimit.

Për shembull, sipas rezultateve të TYNDP 2020, i vetmi kufi serb ku nuk u përcaktua nevoja për investime të reja është kufiri me Shqipërinë, që do të thotë se nevojiten linja të reja të energjisë elektrike në shtatë kufij, sipas EMS.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.