SHBA shpall paketën më të madhe të sigurisë që nga fillimi i luftës në Ukrainë!

Administrata Biden njoftoi gati 3.8 miliardë dollarë ndihmë për sigurinë për Ukrainën dhe aleatët europianë të premten, paketa më e madhe e Uashingtonit që nga fillimi i pushtimit të plotë të Rusisë gati një vit më parë.

Paketa e ardhshme e ndihmës ushtarake, kësti i 29-të i tillë, sjell angazhimin e SHBA-së në luftën e Ukrainës në rreth 24.9 miliardë dollarë që nga fillimi i administratës së Bidenit.

Ndihma përfshin 2.9 miliardë dollarë armë që do t’i jepen menjëherë Ukrainës dhe 225 milionë dollarë financim afatgjatë për të mbështetur ushtrinë e Ukrainës. Paketa përfshin gjithashtu 682 milionë dollarë financime të huaja ushtarake për të rindërtuar arsenalet e aleatëve evropianë.

Paketa e armëve prej 2.85 miliardë dollarësh përfshin automjete luftarake të këmbësorisë Bradley, sisteme artilerie, transportues të blinduar të personelit, raketa tokë-ajër dhe municione.

Të reja në këtë paketë ndihme janë 50 automjete luftarake të këmbësorisë Bradley, automjete të blinduara të gjurmuara të prodhuara nga firma e mbrojtjes amerikane BAE Systems. Bradley zakonisht janë të pajisur me një frëngji rrotulluese, armë të montuar 25 mm dhe raketa antitank TOW. SHBA do të sigurojë 500 raketa antitank TOW dhe 250,000 fishekë municionesh për përdorim me Bradleys.

Zëdhënësi i Këshillit të Sigurisë Kombëtare të SHBA-së, John Kirby tha se do të duhet “disa kohë” që automjetet të arrijnë në Ukrainë. Ai shtoi se “nuk do të zgjasë shumë” që forcat ukrainase të mësojnë se si t’i përdorin automjetet kur trupat amerikane i trajnojnë ato në një vendndodhje jashtë Ukrainës.

SHBA-të do të dërgojnë municion shtesë për sistemet raketore të artilerisë me lëvizshmëri të lartë, ose HIMARS, si dhe raketa RIM-7 për mbrojtjen ajrore dhe 4000 raketa avionësh Zuni. Pentagoni gjithashtu do të furnizojë Ukrainën me pushkë snajper, mitralozë, municione për granatahedhës dhe armë të vogla, si dhe pajisje për shikim natën, pjesë këmbimi dhe pajisje të tjera në terren.

Presidenti ukrainas Volodymyr Zelenskyy falënderoi Presidentin Joe Biden për paketën “shumë të fuqishme” të sigurisë gjatë një video-mesazhi në kanalin e tij zyrtar Telegram.

Edel Strazimiri / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.