SHBA shtoi 315 mijë vende pune në gusht – Por, papunësia u rrit në 3.7%. Pritet vendimi i FED për rritjen e normës bazë

Sipërmarrjet amerikane punësuan pak më shumë punëtorë nga sa pritej në muajin gusht, duke e mbajtur Rezervën Federale në rrugën e duhur për të ofruar një rritje të tretë të normës së interesit me 75 pikë bazë këtë muaj, megjithëse shkalla e papunësisë u rrit në 3.7%.

Punësimet u rritën me 315,000 njësi muajin e kaluar, tha Departamenti i Punës në raportin e tij. Të dhënat për korrikun u rishikuan pak më poshtë duke treguar një rritje të punësimit me 526,000 njësi, kundrejt 528,000 që ishte raportuar më parë. Ky shënoi muajin e 20-të radhazi të rritjes së vendeve të punës.

Raporti i punësimit u publikua një javë pasi kreu Rezervës Federalet, Jerome Poëell, paralajmëroi amerikanët për një periudhë të rritjes së ngadaltë ekonomike dhe ndoshta rritjes së papunësisë, pasi banka qendrore e SHBA-së forcon në mënyrë agresive politikën monetare për të frenuar inflacionin.

Rritja e qëndrueshme e vendeve të punës muajin e kaluar ishte një dëshmi e mëtejshme se ekonomia vazhdon të zgjerohet edhe pse produkti i brendshëm bruto u tkurr në gjysmën e parë të vitit. Fed ka rritur dy herë normën bazë të interesit me 75 pikë përqindjeje në qershor dhe korrik. Që nga marsi, ajo e ka ngritur atë normë nga afër zero në intervalin aktual prej 2.25% në 2.50%.

Tregjet financiare po vlerësojnë një probabilitet afërsisht 70% të një rritjeje prej 75 pikësh bazë në takimin e Fed në 20-21 shtator. Të dhënat e gushtit për çmimet e konsumit që pritet të publikohen në mes të muajit shtator do të jenë gjithashtu një faktor kryesor në përcaktimin e madhësisë së rritjes së ardhshme të normës bazë.

Pavarësisht rritjes së rreziqeve të recesionit, tregu i punës vazhdon të përcaktojë rrugën e tij. Në ditën e fundit të korrikut u hapën 11.2 milionë vende pune, me dy vende pune për çdo të papunë. Aplikimet për herë të parë për përfitimet e papunësisë janë shumë të ulëta sipas standardeve historike.

Ekonomistët ia atribuan elasticitetin e tregut të punës bizneseve që po rrisin punësimin pasi përjetuan vështirësi në vitin e kaluar kur pandemia COVID-19 detyroi disa njerëz të largoheshin nga puna pjesërisht për shkak të sëmundjes së zgjatur.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.