Shefi i OKB-së: Moldavia është fqinji më i brishtë i Ukrainës. Pasojat e luftës së afërt të Rusisë janë “shumë të frikshme për t’u menduar!

Moldavia është “fqinji më i brishtë” i Ukrainës dhe pasojat e luftës së afërt të Rusisë janë “shumë të frikshme për t’u menduar”. Këto ishin fjalët e Sekretarit të Përgjithshëm të OKB-së Antonio Guterres gjatë një vizite në Kishinau të hënën.

Vizita e shefit të OKB-së në Moldavi, jo anëtare e NATO-s dhe një nga vendet më të varfra të Europës, pason një seri incidentesh shqetësuese që kanë tronditur rajonin separatist pro-rus të Moldavisë, Transnistria.

Transnistria, një brez i vogël toke me një popullsi prej rreth 470,000 banorësh, ka qenë nën kontrollin e autoriteteve separatiste që nga një luftë e vitit 1992 me Moldavinë. Rusia ka një bazë rreth 1500 trupash në rajonin e shkëputur, gjoja si paqeruajtës.

Në fund të prillit, tre burra hodhën granata në zyrën e sigurimit shtetëror të rajonit dhe dy antena të mëdha transmetimi u rrëzuan një ditë më vonë. Të premten, policia në Transnistria tha se pajisje shpërthyese u hodhën nga një dron duke lënë kratere 1 metër të thellë pranë një fshati.

“Jam thellësisht i shqetësuar për vazhdimin dhe përhapjen e mundshme të luftës që Rusia po bën në Ukrainë”, tha Guterres, duke shtuar se sovraniteti dhe integriteti territorial i Moldavisë “nuk duhet të kërcënohen apo minohen”.

“Moldavia është në vijën e parë të ruajtjes, paqes dhe stabilitetit në botë. Me luftën kaq afër dhe me ndarjet që janë tani. Shpresa ime është se do të ketë një ndjenjë të qartë përgjegjësie të të gjithë aktorëve.”

Guterres mbajti një konferencë të përbashkët shtypi me kryeministren e Moldavisë Natalia Gavrilita.

“Sot, Republika e Moldavisë po përballet me mbivendosje të paprecedentë të krizës,” tha ajo. “Por, pavarësisht sfidave, ju siguroj se Republika e Moldavisë është në rrugën e zhvillimit, demokracisë dhe integrimit europian”. AP

Edel Strazimiri / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.