Shëndeti i kafshëve në dobi të shëndetit të njeriut/ Mbahet takimi i përfaqësuesve të Visegrad Vet+ për herë të parë në Tiranë!
Përfaqësues të Visegrad Vet +, të Urdhrave të Mjekëve Veterinare nga Europa si Hungaria, Kroacia, Polonia, Çekia, Bavaria, Italia, Greqia, Serbia, Bosnja,Maqedonia e Veriut, Sllovakia, Sllovenia si dhe Presidentët respektivë të Federatës Europiane të Veterinarisë, Unioni Europian i Veterinerve të Praktikës, Unioni Europian i Higjenistëve Veterinar dhe shoqata ”Dogs Trust”, diskutuan në Tiranë zhvillimet më të fundit për ndryshimet veterinare në Bashkimin Europian. Në fokus ishte shëndeti i kafshëve në dobi të shëndetit të njeriut, (“one health”).
Temë thelbësore ishte rritja e kapaciteteve veterinare, trajnimi i vazhduar dhe përmirësimi i njohurive më të fundit të shkencës veterinare, një profesion kryesor dhe i pazëvendësueshëm në mirëqënien e kafshëve dhe shëndetin publik.
Gjithashtu u diskutua regjistrimi dhe unifikimi i pasaportave për qentë dhe macet, duke ndërprerë abuzimet me kafshët e vogla dhe duke monitoruar e kontrolluar sëmundjen e tërbimit, e cila është një rrezik potencial për njerëzit.
Një tjetër temë ishte rezistenca ndaj antibiotikëve dhe përdorimi i barnave veterinare te kafshët dhe kërkesat e fundit të BE. Ministrja e Bujqësisë, Anila Denaj u shpreh se fokusi i Ministrisë së Bujqësisë është mbrojtja e shëndetit të konsumatorit, duke mbështetur shërbimin veterinar privat dhe shtetëror.
Ajo vuri theksin në parimin “një botë, një shëndet” dhe gatishmërinë e dikasterit për mbështetjen e veterinarëve të Shqipërisë. Po ashtu, takimin e përshëndeti dhe Dekani i Fakultetit të Mjekësisë Veterinare, Rezart Postoli, Drejtori i Autoritetit Kombëtar të Veterinarisë dhe Mbrojtjes së Bimëve, Roland Meçaj dhe Doktor Artan Xhafa.
Në fund të takimit, dhomat veterinare europiane falënderuan Urdhrin e Mjekëve Veterinar të Shqipërisë për organizimin dhe u nënshkrua një dokument për Komisionin Europian mbi ndryshimet ligjore që duhet të ndërmerren. Ky ishte takimi i parë që u mbajt në Shqipëri në nivel organizatash Veterinare të Bashkimit Europian.
Alida Lula SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.