“Shkëlqen” biznesi i madh, pakëson borxhet e rrit fitimet – BSH: Ndërmarrjet kanë financuar aktivitetin me shitje, jo më kredi për rroga, por për investime
Dhe ndërsa familjet kanë vuajtur rritjen e çmimeve dhe rënien e të ardhurave, situata financiare e biznesit, veccanërisht kompanive të mëdha, shfaqet krejtësisht ndryshe. Paralelisht me vrojtimin e huamarrjes së familjeve, banka e Shqipërisë ka kryer një tjetër vrojtim mbi 1,365, të cilët kanë raportuar një panoramë tërësisht të ndryshme financiare.
Vetëm 40% e totalit të ndërmarrjeve që i janë përgjigjur pyetësorit deklarojnë se kanë aktualisht hua për të paguar, më rënie me 2.9 pp krahasuar me gjashtëmujorin e mëparshëm. Bie në sy se këtë situatë pozitive e kanë gëzuar bizneset e mëdha e të mesme, ndërkohë që biznesi i vogël ka një përkeqësim të lehtë të treguesve të huamarrjes, me 0.3 pp.
Ecuria e nivelit të shitjeve dhe e rezultatit financiar ka vijuar të përmirësohet në krahasim me gjashtëmujorin e dytë 2021, për ndërmarrjet e mesme dhe ato të mëdha. Mbi 90% e ndërmarrjeve, në secilin grup sipas madhësisë, kanë raportuar fitim gjatë periudhës.
Gjatë periudhës, rreth 59% e ndërmarrjeve që i janë përgjigjur pyetësorit deklarojnë se e kanë financuar veprimtarinë e tyre nëpërmjet shitjeve, duke shënuar rënie për ndërmarrjet e vogla dhe ato të mesme.
Krahasuar me gjashtëmujorin paraardhës, pesha e ndërmarrjeve që kanë marrë hua për kryerjen e një investimi ka shënuar rritje për të gjitha madhësitë e ndërmarrjeve, ndërkohë që pesha e ndërmarrjeve të cilat kanë marrë hua me qëllim përballimin e shpenzimeve afatshkurtra ka mbetur thuajse e pandryshuar për ndërmarrjet e vogla dhe të mëdha.
Rreth 82% e ndërmarrjeve huamarrëse të vogla, 81% e ndërmarrjeve të mesme dhe 82% e atyre të mëdha, e konsiderojnë të përshtatshëm nivelin e tyre të huamarrjes për financimin e veprimtarisë. Krahasuar me periudhën e kaluar, kjo peshë ka vijuar të bjerë për ndërmarrjet e mesme dhe të mëdha.
Lorenc Rabeta / SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.