Shkollat publike në SHBA, në luftë me teknologjinë – Seatle hedh në gjyq rrjetet sociale: Dëmtojnë adoleshentët!

Shkollat publike në Seatle të Shteteve të Bashkuara të Amerikës kanë hedhur në gjyq gjigantët e teknologjisë pronarë  të TikTok, Instagram, Facebook, YouTube dhe Snapchat, duke i akuzuar se janë përgjegjës për dëmet në shëndetin mendor të miliona adoleshentëve. Në dokumentin prej 91 faqesh të dorëzuar më gjykatë, sipas raportimeve të mediave amerikane, theksohet se ng 2009 deri në 2019-ën është regjistruar një rritje prej 30% e të rinjve në shkollat publike të qytetit të cilët pranojnë se ndihen të trishtuar ose të pashpresë, pothuajse cdo ditë për dy javë ose më shumë.

Në mënyrë të vecantë shkollat akuzojnë rrjetet sociale se janë përgjegjëse për përhapjen në masë të një serie patologjish si ankthi, depresioni, problemet me të ushqyerit dhe bulizmi. Jo vetëm kaq. Sipas akuzës e gjithë kjo situatë e bën më të vështirë për shkollat që të bëjnë punën e tyre në mësimdhënie duke i detyruar që të kërkojnë mbështetjen e profesionistëve të shëndetësisë mendore. Gjithashtu shkollave iu duhet të hartojnë plane didaktike alternative dhe paralele për pasojat e rrjeteve socuale, si dhe të trajnojnë mësuesit për temën.

Në thelb, gjykatës i kërkohet që të urdhërojë kompanitë e mëdha teknologjike që të dëmshperblejnë adoleshentët dhe të paguajnë për mjekimin si pasojë e përdorimit të tepruar dhe problematik të rrjeteve sociale.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.