Shqipëria ‘hap dyert’ për mish derri nga 14 shtete, por me disa kushte – Mbarështimi vendas humbet 21 mijë krerë në 5 vjet!
Shqipëria ka rikonfirmuar dyert e hapura për importin masiv të mishit të derrit që vjen nga 14 shtete, europiane dhe të rajonit. Referuar urdhrit më të fundit të Ministrisë së Bujqësisë, vendi ynë mund të furnizohet pa kufizime me mish derri nga Rumania, Hungaria, Sllovakia, Polonia, Letoni, Bullgari, Estoni, Serbi, Lituani, Maqedonia e Veriut, Itali, Gjermani, Moldavi, Ukrainë. Ministria e Bujqësisë ka bërë disa ndryshime, sa i takon rajoneve nga ku mund të importohen, ndërsa duhet të zbatohen edhe disa rregulla strikte sigurie, të cilat kanë qenë të vendosura dhe më parë.
Konkretisht, për kafshët e gjalla të llojit derra të butë dhe të egër, certifikata shëndetësore veterinare duhet të vërtetojë, që kafshët: nuk kanë shfaqur shenja klinike të murtajës afrikane të derrave ditën e dërgesës; janë mbajtur që nga lindja ose për tre muajt e fundit në një zonë pa prezencë të murtajës afrikane të derrave; ose janë mbajtur në një stacion karantine, të izoluar për 30 ditë përpara dërgesës dhe i janë nënshtruar një testi virologjik dhe një testi serologjik të kryer të paktën 21 ditë pas hyrjes në stacionin e karantinës, me rezultate negative.
Kritere të sigurisë ushqimore kërkohen edhe për produkte dhe nënprodukte të tyre. Referuar strukturës së blegtorisë në njësi, mbarështimi i derrave zë vetëm 6.6 % dhe në 5 vitet e fundit ka pasur një rënie të konsiderueshme me 21 mijë kere, duke u fiksuar në 159 mijë krerë në 2021-shin nga 180 mijë që ishin në 2017.
Përqendrimi më i madh i mbarështimit të derrave është në qarkun e Lezhës me 35,6% dhe të Fierit me 19,6% ndaj numrit të përgjithshëm të krerëve. Kukësi është qarku më pak përfaqësues për numrin e derrave me 0,4% ndaj numrit gjithsej të krerëve.
Elisabeta Dosku/ SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.