Shqipëria, nën pragun e transparencës buxhetore – Shkaku kryesor mbetet pamundësia e monitorimit të performancës
Shqipëria ende nuk është në pragun e duhur të transparencës buxhetore. Referuar të dhënave të Anketës së Buxhetit të Hapur, vendi ynë ka shënuar 52 nga 100 pikë në total.
Nëse rezultati i transparencës do të ishte mbi 61 pikë, tregon se po publikohen materialet e mjaftueshme për të mbështetur debatin publik të informuar mbi buxhetin dhe menaxhimin e tij.
Por cilët janë shkaqet e këtyre rezultateve? Referuar Draft-Planit Kombëtar për vitet 2022-2024 faktori kryesor që ka shkaktuar mos transparencë buxhetore është pamundësia për të monitoruar performancën e përgjithshme të ministrive të linjës dhe institucioneve buxhetore.
Për të përmirësuar klimën e transparencës, është parashikuar ndërtimi i kapaciteteve të brezave të rinj dhe stafi i organizatave joqeveritare në fushën e proceseve buxhetore për t’i mbajtur institucionet publike përgjegjëse ndaj mënyrës se si i përdorin fondet publike.
Ndër të tjera në draft-plan theksohet se organizatat e shoqërisë civile duhet të kontribuojnë në ndërtimin e kapaciteteve për grupet e synuara për të ushtruar rolin e tyre si qytetarë aktivë ndaj institucioneve publike përgjegjëse për përdorimin e fondeve publike në mënyrë efikase dhe efektive, siç kërkohet në Ligjin Organik të Buxhetit në Shqipëri.
Ndërkaq për përmirësimin e procesit të monitorimit dhe rritjes së transparencës buzhetore, u propozuar përditësimi i Udhëzimit për monitorimin e buxhetit për përfshirjen e Treguesve Kyç të Performancës në procesin e monitorimit.
Diamila Leka/ SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.