Shqiptarët, 18 milionë dollarë për të siguruar jetën e shëndetin – Janar-korrik, portofoli i aksidenteve rritet me 15%, bien dëmshpërblimet e kompanive
Portofolet e shendetit dhe të jetës kanë qenë ndër paketat e sigurimeve që kanë shënuar rritjen më të dukshme për vitin 2022, ndërkohë që rritje më të ulët kanë shënuar portofolet e pronave. Autoriteti i Mbikqyrjes Financiare raporton se të ardhurat nga sigurimet e Aksidenteve dhe Shëndetit, gjatë periudhës janar-korrik 2022, arritën në rreth 871 milionë lekë, afërsisht 8.5 milionë dollarë, duke shënuar një rritje prej 15.12% në krahasim me periudhën janar-korrik 2021.
Edhe më e dukshme ka qenë rritja e portofolit të sigurimeve vullentare të jetës. AMF raporton se Primet nga sigurimet e Jetës gjatë periudhës janar-korrik 2022, arritën rreth 992 milionë lekë, thuasje 10 milionë dollarë, ose 25.15% më shumë se në të njëjtën periudhë të një viti më parë.
Ndërkaq, sa i përket tregut në tërësi, të ardhurat nga primet e shkruara bruto të sigurimit për periudhën janar-korrik 2022 kapën vlerën 11, miliardë lekë, ose 8.51% më shumë se në janar-korrik 2021. Gjatë periudhës janar-korrik 2022, numri i kontratave të sigurimit të lidhura arriti në 705,545 me një rritje prej 17.3% krahasuar me të njëjtën periudhë të një viti më parë.
Tregu mbetet i orientuar tek sigurimet e Jo-Jetës, të cilat sollën 91.54% të vëllimit të përgjithshëm të primeve, ndërsa sigurimet e Jetës kanë 8.36%. Parë nga këndvështrimi i ndarjes së tregut sipas llojit të sigurimit, i detyrueshëm dhe vullnetar, primet e shkruara bruto të sigurimit vullnetar zënë 41.12% dhe primet e shkruara bruto të sigurimit të detyrueshëm zënë 58.88% të totalit të tregut.
Ndërkaq, gjatë periudhës janar-korrik 2022, dëmet e paguara bruto në tregun e sigurimeve, arritën në rreth 3,703 milionë lekë, ose 12.77% më pak se në periudhën janar-korrik 2021.
Lorenc Rabeta / SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.