Shqiptarët po sigurojnë më shumë jetën e shëndetin: Janar-shtator 2022/ Rritet me 22.4% portofoli i jetës, arrin në total në 12 milionë dollarë

Duket se Pandemia Covid 19, e cila vijon të qarkullojë ende mes popullatës, ka nxitur shqiptarët marrin masa për të siguruar jetën e shëndetin. Autoriteti i Mbikqyrjes Financiare raporton rritje të fortë të portofoleve të sigurimit të shëndetit e veccanërisht atë të jetës. Aipas të dhënave të AMF, Primet nga sigurimet e Jetës gjatë periudhës janar-shtator 2022, arritën rreth 1,2 miliardë lekë, afërisht 12 milionë dollar, ose 22.41% më shumë se në të njëjtën periudhë të një viti më parë.

Po ashtu, arkëtimet e kompanive nga sigurimet e Aksidenteve dhe Shëndetit, gjatë periudhës janar-shtator 2022, arritën në rreth 1 miliardë lekë, duke shënuar një rritje prej 17.42% në krahasim me periudhën janar-shtator 2021.

Kredia bankare gjithashtu është një factor tjetër që ndikon në volumin e sigurimeve të jetës, duke qenë se është një prej kushteve që duhet të plotësojnë kredimarrësit për miratimin e huave.

Ndërkohë që rritje krahasuar me një vit më parë ka shënuar gjithë tregu i sigurimeve. Të ardhurat nga primet e shkruara bruto të sigurimit për periudhën janar-shtator 2022 kapën vlerën 15,5 miliardë lekë, afërisht 150 milionë dollar, ose 9.46% më shumë se në janar-shtator 2021. Gjatë periudhës janar-shtator 2022, numri i kontratave të sigurimit të lidhura arriti në 981,393  me një rritje prej 15.49% krahasuar me të njëjtën periudhë të një viti më parë.

Parë nga këndvështrimi i ndarjes së tregut sipas llojit të sigurimit, i detyrueshëm dhe vullnetar, primet e shkruara bruto të sigurimit vullnetar zënë 38.44% dhe primet e shkruara bruto të sigurimit të detyrueshëm zënë 61.56% të totalit të tregut.

Gjatë periudhës janar-shtator 2022, dëmet e paguara bruto në tregun e sigurimeve, arritën në rreth 4,7 miliardë lekë, afërisht 47 milionë dollar, ose 7.70% më pak se në periudhën janar-shtator 2021.

Lorenc Rabeta / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.