Shtrenjtohen çmimet globale të ushqimeve – Indeksi u rrit ndjeshëm për sheqerin, vajrat bimore, drithërat e bulmetin

Kristi Ceta/SCAN

 

Çmimet botërore të ushqimeve u rritën ndjeshëm në shtator, me ritmin më të shpejtë që nga marsi i vitit 2022, njoftoi Organizata e Kombeve të Bashkuara për Ushqimin dhe Bujqësinë.

Indeksi botëror i çmimeve të ushqimeve për muajin shtator është 124.4 pikë, që paraqet një rritje prej tre për qind krahasuar me gushtin, sipas të dhënave zyrtare. Por shifra mbeti 22.4 për qind nën kulmin e arritur në mars 2022, pas pushtimit të Rusisë ndaj Ukrainës.

Rezultati është pasojë e rritjes së indeksit në të gjitha kategoritë, pasi u shënua rritje e njëkohshme e çmimit të sheqerit, vajrave bimore, drithërave, produkteve të qumështit dhe mishit.

Vlera e indeksit të çmimit të sheqerit u rrit 10.4 për qind në 125.7 pikë në muaj, kryesisht për shkak të motit të thatë dhe zjarreve në fund të gushtit në Brazil, qw dwmtuan të korrat e kallam sheqerit.

Ndërsa indeksi i çmimeve të vajrave bimorë u rrit me 4.6 për qind në muaj, në 142.4 pikë dhe tani është më i larti që nga fillimi i vitit 2023. Çmimet ndërkombëtare të vajit të palmës u shtrenjtuan për të katërtin muaj radhazi, si dhe çmimi i vajit të lulediellit e të sojës.

Vlera e indeksit të çmimeve të drithit në shtator ishte në nivelin 113.5 pikë, që është tre për qind më shumë se në muajin gusht, veçanërisht për shkak të kushteve të pafavorshme atmosferike në disa vende që janë eksportuesit kryesorë të drithërave.

Vlera mesatare e indeksit të çmimeve të produkteve të bulmetit u rrit me 3.8 për qind në 136.3 pikë dhe indeksi i çmimit të mishit me 0.4 për qind në 119.6 pikë.

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.