Si u shpërndanë 994 milionë euro për vepra publike? – “Sëmundja” e qeverisë, fundviti periudha e artë për të “hedhur” para’
Qeveria ka shpërndarë në total 114 miliardë lekë apo 994 milionë euro për investime publike përgjatë vitit që lamë pas. Referuar të dhënave zyrtare nga Ministria e Financave, pjesa më e madhe e fondeve është nga buxheti i shtetit, pra me financim të brendshëm, ndërsa po ashtu një vlerë të konsiderueshme përfaqëson edhe fondi i rindërtimit.
Konkretisht nga paratë e disbursuara gjatë vitit që lamë pas, 59.5 miliardë lekë janë financim i brendshëm, 28.8 miliardë lekë e zë fondi i rindërtimit, 24.7 miliardë lekë zënë projektet me financim të huaj dhe 1 miliardë lekë janë investime nga të ardhurat e arsimit të lartë. Fondet e akorduara për rindërtimin, pavarësisht se kanë kaluar 4 vite nga tërmeti i 26 nëntorit 2019, zënë rreth 25 për qind të investimeve totale.
Nëse do të shikonim ecurinë e investimeve përgjatë gjithë vitit duke u fokusuar tek fondi i rindërtimit vihet re disbursim i pabarabartë ndër muaj. Pra e thënë ndryshe, nëse gjatë 11 muajve janë shpenzuar mesatarisht 0.5 deri në 2 miliardë lekë, në Dhjetor kjo shifër ka kapërcyer në 13.7 miliardë lekë, apo 47.6 për qind e fondit të disbursuar vetëm në një muaj.
Po ashtu, i njëjti handikap vërehet edhe tek projektet me financim të brendshëm, ku pjesa me e madhe e disbursimit të fondit është përqendruar në muajin Nëntor dhe Dhjetor, me një vlerë 3-4 herë më të lartë se muajt e tjerë të vitit. Nga shifrat rezulton se 52.8 për qind e fondit total të investimeve me financim të brendshëm është përdorur në dy muajt e fundit të vitit.
Ndërsa investimet me financim të huaj, kanë ndjekur një trajektore më normale disbursimi, e shpërndarë ndër muaj, ku muaji me vlerën më të lartë rezulton Nëntori me rreth 7.8 miliardë lekë. Përqendrimi i fondeve në muajt e fundit të vitit është një praktikë e pa shëndetshme që fatkeqësisht është bërë rrugë për institucionet shtetërore. Një shpërndarje e tillë sjellë vonesa në ecurinë e projekteve publike dhe nga ana tjetër akumulimi i parave në fund të vitit nxit nënshkrim kontratash të shpejta dhe që nuk kalojnë filtrat e duhur.
Elisabeta Dosku/ SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.