Smartfonët po “zhdukin” telefonat fiksë, kanë mbetur 177 mijë – 2022, rritet numri i abonentëve me internet të shpejtë dhe me paketat trefishe

Numri i telefonave fiksë në vend ka pësuar një tjetër tkurrje të fortë gjatë vitit të shkuar. Në total, në tremujorin e fundit të vitit 2022, rezultojnë rreth 177 mijë pajtimtarë të linjave të telefonisë fikse, me një renie prej më shumë se 10% krahasuar me një vit më parë, kur numëroheshin 197 mijë abonentë të telefonisë tradicionale. Rënia është shumë më e dukshme krahasuar me vitin 2020, kur numëroheshin 223 mijë kontrata të telefonisë fiske, pra rreth 40 mijë më shumë.

Gjitësesi, janë vetëm telefonat tradicionalë ato që janë tkurrur, pasi shërbimet e tjera që ofrohen përmes rrjeteve fikse kanë shënuar rritje.

Numri i pajtimtarëve më akses Broadband në internet nga rrjete fikse në T4 2022 arriti në rreth 582 mijë, që përbën një rritje me 2.4% në krahasim me tremujorin e mëparshëm dhe një rritje me rreth 8.5% në krahasim me të njëtin tremujor në vitin 2021.

Numri i pajtimtarëve të rrjeteve fikse që kanë akses në shërbime të integruara (Telefoni/Internet/TV) në fund të 3 mujorit të katërt 2022 arriti në rreth 306 mijë, një rritje kjo me 2.1% në krahasim me T3 2022 dhe rritje me 2.2% krahasuar me T4 2021.

Numri i pajtimtarëve me paketa trefishe (Telefoni, Internet dhe TV) përbën 23.6% të totalit të pajtimtarëve me paketa të integruara ndërsa 29.5% janë me paketa “Internet dhe Telefoni” dhe 46.9% me paketa “Internet dhe TV”. Ndërkaq, 5. 53% e pajtimtarëve me akses broadband në rrjete fikse në fund të T4 2022 ishin pajtimtarë me paketa të integruara (Telefoni/Internet/TV), ku 12% janë me paketa trefishe (Telefoni, Internet dhe TV).

Lorenc Rabeta/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.