“S&P” ul vlerësimin për ekonominë britanike – Vendimi, pas publikimit nga qeveria të minibuxhetit 45 miliardë paund
Agjencia e vlerësimit të kreditit “Standard & Poor’s” uli perspektivën për vlerësimin e saj të kreditit AA për borxhin sovran britanik në “negativ”, nga “të qëndrueshm”, pasi vlerësoi se planet e uljes së taksave të kryeministres Liz Truss do të shkaktonin rritjen e borxhit.
Ministri i Financave, Kwasi Kwarteng, njoftoi rreth 45 miliardë paund ulje të përhershme të taksave më 23 shtator, si dhe subvencione të mëdha të përkohshme për faturat e energjisë për familjet dhe biznesin, duke i çuar tregjet e sterlinës dhe të obligacioneve në një kaos.
Ndërsa, stërlina u rikuperua më pas në vlerë, Banka e Anglisë u detyrua të nisë një program urgjent blerjeje obligacionesh të mërkurën për të stabilizuar tregjet dhe ka paralajmëruar se ndoshta do të duhej të rriste ndjeshëm normat e interesit në nëntor.
“S&P”, që e rendit borxhin e qeverisë britanike një shkallë më të lartë se rivalët “Moody’s” dhe “Fitch”, deklaroi se e vlerëson borxhin publik britanik në një trajektore rritëse, në kontrast me një parashikim të mëparshëm. “S&P” parashikon se Britania do të hyjë në një recesion teknik në tremujorët e ardhshëm dhe PBB e saj do të tkurret me 0.5% në vitin 2023.
Qeveria e Britanisë ka thënë se shkurtimet e taksave dhe reformat strukturore afatgjata në fusha të tilla si imigracioni dhe lejet e planifikimit duhet të nxisin rritjen, por “S&P” tha se përfitimi mund të jetë modest, veçanërisht në afat të shkurtër.
Huamarrja publike e Britanisë mund të arrijë mesatarisht 5.5% të PBB-së në vit nga 2023 në 2025, krahasuar me një parashikim të mëparshëm prej 3%, ndërsa borxhi i publik do të rritet në 97% të PBB-së deri në vitin 2025, parashikon “S&P”.
SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.