Sulmet kibernetike, Qeveria zgjeron marrëveshjen me Microsoft – Akti Normativ, ekspertët amerikanë më shumë akses. Gati ligji “Per qeverisjen elektronike”

Përmes një Akti Normativ, Këshilli i Ministrave ka vendosur të amendojë marrëveshjen me “Microsoft” për sigurinë Kibernetike duke zgjeruar fushat e angazhimit të ekspertëve të gjigandit amerikan sa i përket sistemeve mbrojtëse.

Në relacionin shoqërues të Aktit Normativ, i depozituar në Kuvend, Këshilli i Ministrave bën me dije se ky parashikim eshte i përkohshëm dhe vetëm për vitin 2022, pasi për periudhën në vijim, autorizimi për negociimin dhe nënshkrimin e marrëveshjes së partneritetit strategjik, me “Microsoft Corporation”, do të parashikohet në projektligjin “Për qeverisjen elektronike”, i cili është në proces hartimi.

Një prej pikave më të rëndësishme të Aktit Normativ ka të bëjë me varësinë e Autoritetit Kombetar per Certifikimin Elektronik dhe Sigurine Kibemetike (i njohur si AKCESK), dhe legjislacionin qe rregullon marredhenien e punes se punonjesve te ketij institucioni. Ky institucion me Aktin Normativ, kalon në varësi të drejtpërdrejtë të Kryeministrit për shkak të rëndësisë kritike.

Ndërkohë që ndryshon edhe trajtimi financiar i punonjësve të tij. Për të joshur ekspertë me standardet e nevojshme profesionale, Qeveria ka vendosur të akordojë një shtesë prej 800 mijë lekësh mbi pagën në muaj për ekspertët e AKCESK.

Marrëveshja me Microsoft është nënshkruar që në vitin 2007, dhe e amenduar dy herë më pas, por sulmet e vazhdueshme kibernetike kanë detyruar Qeverinë të ndërhyjë menjëherë për t’i dhënë ekspertëve amerikanë më shumë akses në sistemet shqiptare.

Lorenc Rabeta / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.