Tajlanda legalizon përdorimin e kanabisit – Bima mund të përdoret në ushqime, pije dhe artikuj kozmetike
Nga ëmbëlsirat e mbushura me kanabis, çaji deri tek pasta e dhëmbëve – bizneset në Tajlandë po fitojnë para’ nga kërkesa e madhe e konsumatorëve për të gjitha prodhimet që përmbajnë marijuanë, pas lehtësimit të fundit të ligjeve në fuqi për përdorimin e saj
Në vitin 2018, Tajlanda u bë vendi i parë i Azisë Juglindore që legalizoi marijuanën për përdorim mjekësor dhe kërkime. Vitin e kaluar, ajo lejoi që ekstraktet dhe gjethet e kanabisit të përdoren në kozmetikë, ushqime dhe pije, duke i shtyrë bizneset të zhvillojnë dhe të hedhin në treg produkte të reja për konsum.
Tani Tajlanda po punon për zhvillimin e kanabisit si një burim të ardhurash si dhe për të ndërtuar një industri vendase fitimprurëse duke legalizuar konsumin e bimës në qershor të këtij viti, vendi i parë aziatik që e bën këtë.
Dyqani i ëmbëlsirave në Bangkok, Kanomsiam, është një nga të parët që përdor gjerësisht kanabisin duke shtuar gjethe të thara kanabisi në petullat e tij tradicionale me shije pandani.
Dyqani tani ka një bazë të qëndrueshme të klientëve të rregullt që janë të gatshëm të paguajnë 4.61 dollarë për një pako prej 6 copësh të këtyre petullave në ngjyrë jeshile.
Gjithnjë e më shumë vendas kanë nisur të përdorin pastën e dhëmbëve Channherb, një produkt vendor që përdor ekstrakt vaji kanabis sativa. Ata thonë se efektet janë të menjëhershme sidomos për sa i përket mishërave të dhëmbëve.
Në Tajlandë kanabisi, midis bimëve të tjera lokale, është përdorur prej kohësh nga mjekët tradicionalë për të ndihmuar në zbutjen e simptomave inflamatore.
Ministri i Shëndetësisë Anutin Charnvirakul, i cili është shtytësi kryesor i kësaj politike, vlerëson se industria e kanabisit në Tajlandë do të vlerësohet në mbi 3 miliardë dollarë brenda pesë viteve të ardhshme. Në një intervistë për agjencinë e lajmeve Reuters ai u shpreh se dëshironte të shihte njerëzit të pasuroheshin duke e përdorur këtë produkt në mënyra pozitive.
Tajlanda miratoi me nxitim një sërë rregullash të reja për përdorimin e kanabisit në qershor, pasi dekriminalizimi i planifikuar prej kohësh ngriti alarmin për mundësinë e përdorimit të pakontrolluar të substancës kudo dhe nga kushdo – përfshirë fëmijët.
Zyrtarisht, produktet komerciale të miratuara nga rregullatori i ushqimit dhe barnave mund të përmbajnë kanabidiol (CBD), një kimikat në kanabis që nuk i shkakton përdoruesve efekte anësore.
Sapuni i akneve me gjethe kanabis i markës tajlandeze K&B Cosmetic Co. Ltd, gjithashtu përfitoi nga përpjekjet e fundit të qeverisë për të promovuar kanabisin.
Një dyqan çaji në provincën lindore Chonburi të Tajlandës i është bashkuar gjithashtu ‘etheve’ të kanabisit duke krijuar një menu të veçantë të pijeve me kanabis pasi ligji lejon që gjethet të përdoren në ushqim dhe pije.
Dorina Kurtaj / SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.