Taksë mbi fitimin e prodhuesve të energjisë – Depozitohet projektligji, mjet I përshtatshëm për të trajtuar fitimet e tepërta

Prodhuesit e energjisë elektrike, që tregtojnë energji në tregun e liberalizuar do të taksohen më tepër gjatë vitit 2023 dhe 2024. Qeveria ka depozituar në Kuvend projektligjin, që parashikon taksimin mbi të ardhurat shtesë të realizuara prej tyre, të cilin e quan kontribut solidariteti të detyrueshëm.

Sipas dokumentit të depozituar në Kuvend, kontributi i solidaritetit do llogaritet mbi të ardhurat shtesë të krijuara nga shitja në treg të lirë e energjisë elektrike të prodhuar me çmim më të lartë se 8.5 lekë/kWh.

Ndërkohë që, gjysma e këtyre të ardhurave shtesë do të duhet të depozitohet në buxhetin e shtetit. Propozim vjen në një kohë kur prodhuesit që shesin energji në tregun e liberalizuar kanë rritur fitimet, si pasojë e ritjes së çmimeve në tregjet ndërkombëtare.

Ndërkohë që, sipas qeverisë kjo taksë është një mjet i përshtatshëm për të trajtuar fitimet e tepërta, në rast rrethanash të paparashikuara. “Këto fitime nuk korrespondojnë me ndonjë fitim të rregullt që kompanitë e prodhimit të energjisë do të prisnin ose mund të kishin pritur të merrnin në rrethana normale, nëse nuk do të kishin ngjarjet e paparashikueshme në tregjet e energjisë”,- thuhet ndër të tjera në relacionin që shoqëron projektligjin, duke shtuar se këto para’ do të përdoren për paketat sociale në ndihmë të qytetarëve.

“Futja e një kontributi solidariteti përbën një masë të përkohshme që bën të mundur krijimin e të ardhurave shtesë për qeverinë për të ofruar mbështetje financiare për familjet dhe kompanitë e prekura rëndë nga rritja e çmimeve të energjisë’, – shtohet më tej. Ligji do të jetë i zbatueshëm vetëm nëse në vitin përkatës çmimi mesatar i shitjes së energjisë në bursën hungareze është mbi 180 Eur/mWh, por në çdo rast ai e humb efektin e tij në datën 31 dhjetor 2024.

Ola Mitre / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.