“Tarifat e ujit, rritje me 75%” – Draft strategjia: Të ardhurat, për mbulimin e kostove të operimit të ujësjellësve

Tarifat e ujit do të rriten me 75%, deri në vitin 2030 me qëllim rritjen e qëndrueshmërisë financiare të shoqërive të ujësjellës – kanalizimeve. Gjithçka përcaktohet në Strategjinë Kombëtare të Sektorit të Furnizimit me Ujë dhe Kanalizimeve, 2022-2030, të nxjerrë për konsulim publik nga Ministria e Infrastrukturës dhe Energjisë. Sipas dokumentit, rritja mesatare e tarifave nuk e prek çështjen reale të përballueshmërisë pasi tarifa mbetet nën pragun që mban në konsideratë Enti Rregullator i Ujit, sipas të ardhurave të familjeve.

Madje konsiderohet e përballueshme edhe për 10% e popullsisë me të ardhura më të ulta. “Për më tepër, tarifa mesatare mbetet tre herë më e ulët se pragu i përballueshmërisë, duke theksuar se ka ende hapësirë për të rritur tarifat me qëllim përmirësimin e performancës financiare të shoqërive”, – thuhet ndër të tjera në document.

Gjithsesi, drafti i nxjerrë për konsultim thekson se nëse tarifat do të rriten për të mbuluar kostot totale të operimit, disa çështje të përballueshmërisë mund të lindin sidomos për 40% që përfaqëson familjet me të ardhura më të ulëta.

Tarifat që paguhen nga qytetarët konsiderohen nga strategjia si burimi më i qëndrueshëm i financimit të sektorit, ndërkohë që pjesa tjetër synohet të sigurohet përmes fondeve të mbledhura nga taksat kombëtare, rajonale apo lokale që përdoren për të financuar sektorin UK.

Burimi i tretë i financimit janë transfertat, ku futen grantet nga burime të huaja. Në total stratgeia vlerëson se nevoja për financime deri në vitin 2023 është rreth 1.25 mld euro, ku kostot kapitale zëne 92% të totali dhe kostot korente 8%.

Ola Mitre / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.