Të bësh ski në Arabinë Saudite! – Projekt ambicioz për ndërtimin e një resorti dimëror 33 herë më të madh se Nju Jorku

Nëse Katari mund të presë Kampionatin Botëror të futbollit, Arabia Saudite mund të presë Lojërat Dimërore Aziatike në shkretëtirë. Si pjesë e projektit të tij prej 500 miliardë dollarësh qyteti Neom po planifikon ndërtimin e një resorti dimëror që do të jetë 33 herë më i madh se Nju Jorku me qëllim zhvillimin e Lojërave Dimërore Aziatike 2029.

Projekti i quajtur Trojena dhe që pritet të përfundojë në vitin 2026, do të shtrihet në 60 kilometra katrorë dhe do të përfshijë një fshat skijimi, një liqen artificial dhe vila ultraluksoze.

Vizitorët do të mund të bëjnë ski, biçikletë malore dhe sporte të ndryshme ujore, në temperatura që do të jenë mesatarisht 10 gradë Celsius më të ulëta se ato që mbizotërojnë në qytetet e tjera të Arabisë Saudite. Në dimër, temperatura do të bjerë deri në 0 gradë Celsius.

Në një lartësi prej 1500 deri në 2600 metra, resorti do të ketë restorante dhe dyqane, hotele luksoze dhe spa, si dhe një liqen artificial. Në total do të ndërtohen më shumë se 3600 dhoma hoteli dhe 2200 rezidenca.

Trojena do të jetë e hapur gjatë gjithë vitit, duke ofruar ski, snowboard, patinazh në akull, javën e modës dimërore dhe festivale të filmit dhe muzikës në sezonin e dimrit, nga dhjetori në mars.

Më pas vjen i ashtuquajturi sezon i aventurës, që i kushtohet aktiviteteve si ngjitja në mal dhe çiklizmi. Sezoni i liqenit, nga maji deri në shtator, përfshin kryesisht festivale të gastronomisë, artit, aktiviteteve kulturore etj.

Resorti vlerësohet të tërheqë 700,000 vizitorë deri në vitin 2030, të krijojë 10,000 vende pune dhe 1 miliard dollarë të ardhura për Arabinë Saudite.

Dorian Koca / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.