Tesla ul sërish çmimin e automjeteve në Kinë – Shkak, niveli i ulët të kërkesës

Tesla ka ulur çmimet e automjeteve në Kinë për herë të dytë në më pak se tre muaj, duke nxitur një luftë çmimesh mes një perspektive të përkeqësuar të kërkesës në tregun më të madh të automjeteve në botë.

Ulja e fundit, e shoqëruar me atë të muajit tetor dhe stimuj të ndryshëm që arrijnë në 10 mijë juanë, dhënë blerësve kinezë gjatë tre muajve të fundit është e barabartë me një rënie prej 13 deri në 24 për qind të çmimeve të Tesla-s në krahasim me shtatorin. Prodhuesi amerikan i automjeteve elektrike uli çmimet e të gjitha versioneve të automjeteve të tij Model 3 dhe Model Y në Kinë nga 6% në 13.5%, sipas llogaritjeve të Reuters bazuar në çmimet e treguara në faqen e tij të internetit. Çmimi fillestar i Modelit 3, për shembull, është ulur në 229.900 juanë  – 33.427 dollarë – nga 265.900 juanë.

Zëvendëspresidentja e Teslës për komunikimet e jashtme në Kinë, u shpreh se rregullimet e çmimeve mbështeten nga risi të panumërta inxhinierike. Sipas saj, ato i përgjigjen kërkesës së qeverisë për të nxitur zhvillimin ekonomik dhe konsumin.

Lëvizja vjen pasi dërgesat në dhjetor të automjeteve të prodhuara nga Tesla në Kinë arritën nivelin më të ulët në pesë muaj dhe disa ditë para përfundimit të programit të subvencionimit të Pekinit që ndihmoi në krijimin e tregut më të madh të automjeteve elektrike në botë. Kërkesa në rënie e ka detyruar Teslën dhe rivalët e saj të thithin peshën kryesore të këtij vendimi.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.