“Thesi” i investimeve publike u hap në Dhjetor! – 45% e fondit total, afro 435 milionë euro u shpenzuan vetëm në 1 muaj

Ndërsa ecuria e investimeve publike përgjatë vitit 2022 ka qenë shumë e dobët, çka detyroi qeverinë të ndryshojë buxhetin dy herë brenda muajit Dhjetor, rezulton se të gjitha paratë e mbetura “stok” deri në atë periudhe kanë arritur të disbursohen në mbyllje të vitit. Konkretisht, sipas të dhënave zyrtare të Ministrisë së Financave, totali i shpenzimeve kapitale të realizuara në nëntor 2022 rezultonte në 62 miliardë lekë, ndërsa në Dhjetor arriti në 112.1 miliardë lekë.

E thënë ndryshe, vetëm në muajin e fundit të vitit, janë disbursuar për projekte publike 44.7 për qind e fondit total të projektuar përgjatë gjithë vitit.  Pra, vetëm gjatë Dhjetorit për shpenzime kapitale shkuan 50.1 miliardë lekë apo 435 milionë euro. Por se sa efektive kanë qenë këto shpenzime dhe ku kanë shkuar, kjo mbetet për tu parë në vijim.

Ndërkohë, buxheti i shtetit ka shpenzuar në total 137.4 miliardë lekë vetëm në Dhjetor 2022,  apo 20.7 për qind të totalit të shpërndarë përgjatë gjithë vitit. Sipas dhënave të publikuara nga Ministrisë së Financave, shpenzimet e përgjithshme publike, për vitin 2022, arritën në rreth 651 miliard lekë me një realizim në masën 102.1 për qind të planit vjetor sipas Buxhetit Fillestar.

Ndërsa krahasuar me vitin 2021 shpenzimet e përgjithshme publike rezultojnë 9.2 për qind më të larta ose rreth 55.05 miliardë lekë më shumë.  Krahasuar me vitin 2021, vihet re një rritje e konsiderueshme e shpenzimeve korrente me 8.4 për qind dhe rënie e shpenzimeve kapitale me 12.2 për qind.

Niveli i deficitit për vitin 2022 rezultoi në rreth 78.2 miliard lekë ose 77.5 për qind e planit vjetor të Buxhetit Fillestar. Krahasuar me vitin 2021, niveli i deficitit është ulur me 8.4 për qind.

Elisabeta Dosku/ SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.