Tirana akuzon Londrën për emigrantët e paligjshëm! – Burime qeveritare për The Guardian: Britania nuk dha informacion e nuk bashkëpunoi

Një dështim i  ministrisë së Brendshme në dhënein e informacionit qeverisë shqiptare për sa i përket itinerarit të personave që mbërrijnë ilegalisht në Britaninë e Madhe, është arsyeja kryesore e pamundësisë për të bllokuar kalimin e emigrantëve në kanalin e Lë Mansh.

Burime të qeverisë shqiptare, sipas britanikes The Guardian, thonë se janë përpjekur disa herë për të marrë informacion nga Britania e Madhe për ata që udhëtojnë me barka të vogla, por pa rezultat. Një situatë që ka lënë qeverinë shqiptare në errësirë të plotë. Një arsye e mundshme për mospërcjelljen e informacionit nga Ministria e Brendshme e Britanisë, është formulimi i një marrëveshjeje të nënshkruar në vitin 2021 për dëbimet e përshpejtuara të personave, të cilët hyjnë ilegalisht në vend.

Marrëveshja ndalon dhënien e informacionit “nëse shkëmbimi, përdorimi ose zbulimi i mëtejshëm” mund të nënkuptojë se u është dhënë atyre nga të cilët njerëzit kërkojnë strehim. “Ne kemi bërë gjithçka që na është kërkuar”, tha një burim në qeverinë shqiptare për The Guardian. “E vetmja gjë që kemi kërkuar nga miqtë tanë britanikë është të na japin disa informacione për 140.000 shqiptarët që jetojnë në Britani. Vetëm Britania ka informacion mbi rrugët me anë të të cilave ata mbërrijnë atje”, shtoi burimi

Më shumë se 38.000 emigrantë kanë mbërritur në Britani me barka të vogla përgjatë Kanalit deri më tani këtë vit. Rreth 12.000 raportohen shqiptarë, krahasuar me një total prej 800 vitin e kaluar dhe 50 në 2020-ën.

Burimet e qeverisë shqiptare shprehën zhgënjim për mungesën e një bashkëpunimi efektiv, nisur nga shqetësimet për këtë çështje në qeverinë britanike.

Tirana ka siguruar oficerët e Forcave Kufitare për të operuar në Dover, siç kërkohet nga Ministria e Brendshme dhe zyrtarët kanë kontrolluar ata që po fluturonin jashtë Shqipërisë.

Burimi tha, megjithatë, se rrugë të shumta po përdoreshin nga shqiptarët, duke përfshirë vajtjen në Kosovë për të marrë një autobus në Gjermani dhe një tren për në Francë. “Ata nuk bëjnë asgjë të paligjshme derisa hipin në barkat e vogla,” tha burimi.

Më tej besohet se shumë nga shqiptarët nuk kishin jetuar në Shqipëri, por gjetkë në Europë. Qeveria shqiptare nuk ka parë një rritje të nisjeve nga vendi që të korrespondojë me rritjen e numrit e atyre që kalojnë Kanalin.

Megjithatë, zhgënjimi kryesor në Tiranë është dështimi i qeverisë së Mbretërisë së Bashkuar për të zbatuar një marrëveshje për dëbimet e shpejta të atyre shqiptarëve që mbërrijnë ilegalisht në vend nëpërmjet një vendi të tretë të sigurt.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.