Tkurret ekonomia e eurozonës – Situata në Ukrainë vendos Europën përballë sfidave të reja!

Parashikimet për ekonominë e Bashkimit Europian para shpërthimit të luftës, flisnin për një zhvillim dhe shtrirje të qëndrueshme. Por pushtimi rus i Ukrainës ka nxjerrë në pah sfida të reja, në një moment që BE po përpiqej të rimëkëmbej nga pandemia e Covid.

Duke u përballur me presion në rritje për sa i përket cmimeve të produkteve bazë që vijojnë të rriten, duke shkaktuar shqetësime për furnizimin por dhe pasiguri, lufta po përkeqëson një situatë ekzistuese të rëndë e cila pritet të përshkallëzohet. Një gjë e tillë detyron Komisionin Europian që të rishoh dhe një herë pritshmëritë për sa i përket zhvillimit ekonomik në zonën euro por dhe parashikimet për rritjen e inflacionit.

Prodhimi i brendshëm bruto i Bashkimit Europian pritet të qëndrojë në një territor pozitiv në të ardhmen, falë dhe kombinimit të rihapjes së vendeve pas pandemisë dhe politikave të forta të ndërmarra për mbështetjen e ekonomisë gjatë dhe pas pandemisë.

Shërbimet intensive të kontakteve janë rihapur pas pandemisë, duke përforcuar tregun e punës; por dhe reduktimi i grumbullimit të kursimeve apo masat fiskale për të përballuar më mirë cmimet e larta energjitike në favor të konsumatorit privat. Investimet do të jenë të parat që do të përfitojnë nga fondi për rimëkëmbjen nga pandemia por dhe nga implementimi i axhendës së reformave.

Rritja e PBB në BE dhe në zonën euro pritet të jetë 2.7% në 2022-shin dhe 2.3% në 2023-shin. Ulja e gradimit për vitin 2022 duhet lexuar në sfondin e rritjes së vrullshme të ekonomisë në pranverë dhe verën e vitit të kaluar, që i shton rreth 2 pikë përqindje normës vjetore të rritjes për këtë vit. Rritja e prodhimit brenda vitit është ulur nga 2.1% në 0.8%.

Goditja kryesore për ekonomitë globale dhe të BE-së vjen nga rritja e çmimeve të mallrave dhe energjisë. Edhe pse ishin rritur ndjeshëm para luftës, si pasojë e pandemisë, pasiguria në lidhje me zinxhirët e furnizimit ka shkaktuar një rritje të mëtejshme të cmimeve. Kjo vërtetohet kryesisht për produktet ushqimore e mallrat dhe shërbimet e tjera bazë, ndërsa paralelisht me këtë shënohet një rënie e fuqisë blerëse nga ana e familjeve.

Ndërprerjet e logjistikës dhe zinxhirit të furnizimit të shkaktuara nga lufta, si dhe rritja e kostove të hyrjes për një gamë të gjerë lëndësh të para, shtojnë shqetësimet në tregtinë globale të shkaktuara nga masat drastike të kontrollit të COVID-19 që zbatohen ende në një pjesë të Kinës, duke rënduar mbi prodhimin.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.