Transparenca, sa gjobiten punonjësit e administratës? – Ulet kufiri minimal për disa shkelje, shtohen masa të reja administrative

Institucionet publike apo punonjësit përgjegjës të cilët nuk respektojnë ligjin për të drejtën e informimit do të ndëshkohen me gjoba. Projekligji i ri “Për të drejtën e informimit”, i hartuar nga Ministria e Drejtësisë dhe i hedhur për konsultim publik, ka si qëllim rritjen e transparencës dhe llogaridhënies së administratës publike, rregullimi i përgjegjësisë së personave të cilët bëhen shkak për mosdhënien e përgjigjeve për kërkesat për informacion, rritjen e përgjegjshmërisë së nëpunësve të administratës publike si dhe mbrojtjen dhe fuqizimin e koordinatorit për të drejtën e informimit gjatë ushtrimit të detyrës.

Drafti në fjalë ka bërë disa përmirësime nga ligji aktual, ku rishikohet me ulje kufiri minimal i gjobave ndërsa shtohen masa të reja administrative. Konkretisht refuzimi i dhënies së informacionit, dënohet me 50 -300 mijë lekë; mos publikimi i akteve brenda afatit ligjior dhe mos përditësimi i programit institucional të transparencës dënohet me 25 – 50 mijë lekë; moskrijimi, mosmbajtja, mospublikimi apo mospërditësimi i Regjistrit të Kërkesave dhe Përgjigjeve, brenda afatit ligjor dënohet me 25 – 100 mijë lekë.

Ndërkohë shkelje të tjera si mosplotësimi i kërkesave për informacione, të regjistruara në Regjistrin e Kërkesave  dhe Përgjigjeve, brenda afatit ligjor;  mosregjistrimi i kërkesës për informim, moscaktimi i një numri rendor për të dhe mosdhënia e të dhënave të kontaktit të koordinatorit për të drejtën e informimit; mosdërgimi i kërkesës për informim te një autoritet tjetër publik, brenda afatit; dërgimi i kërkesës për informim tek një autoritet tjetër publik kur autoriteti që ka marrë kërkesën e ka informacionin e kërkuar; mosnjoftimi i kërkuesit për vendimin për zgjatjen e afatit për plotësimin e kërkesës për informim dënohen me gjoba që variojnë nga 50-300 mijë lekë.

Gjobat e reja që janë shtuar në draftligj variojnë nga 25 mijë deri në 300 mijë lekë dhe lidhen kryesisht me mos njoftimin e kërkuesit për procedurën e rishikimit, mos arsyetim i vendimit, ose mos njoftimi i vendimit përfundimtar të autoritetit publik; mos caktimi i koordinatorit nga titullari i autoritetit publik ose mos njoftimi pranë Komisionerit mbi këtë caktim; kryerja e veprimeve ose mosveprimeve, që mund të dëmtojnë rezultatin e procedurës administrative për shqyrtimin e ankesave  dhe mos zbatimi i vendimit të Komisionerit kur ka urdhëruar dhënien e informacionit të kërkuar, në mënyrë të plotë ose të pjesshme.

Elisabeta Dosku / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.