Treg i ri në Arabinë Saudite, por sa mish prodhon Shqipëria? – Analiza e shifrave/ Çfarë ka ndodhur me mbarështimin e bagëtive?!

Sektori i blegtorisë është në ditët më të vështira të tij për shkak se numri i bagëtive të mbarështuara ka një rënie të ndjeshme nga vitit në vit. Referuar shifrave zyrtare të  INSTAT, për vitin 2021, numri i gjedhëve dhe të imtave ka pësuar rënie të ndjeshme nga një vit më parë, çka është tregues i qartë i shpopullimit të fshtarave dhe efektit jo të duhur të politikave shtetërore.

Konkretisht  në të gjitha vendin mbarështohen rreth 337 mijë krerë gjedhë,  1.4 milionë krerë dele dhe 775 mijë krerë dhi. Referuar këtyre të dhënave, në vend prodhohet mesatarisht 148 milionë kg mish, çka i përgjigjet vetëm 77.3 për qind të nevojës për konsum, ndërsa pjesa tjetër prej 22.7 për qind mbulohet nga mishi i importit, Italia, SHBA, Greqia Brazili, etj. Nga ana tjetër, shifra e eksporteve është e pandjeshme, pasi ato janë të hapura kryesisht me rajonin.

Së fundmi, Ministria e Bujqësisë ka bërë me dije hapjen e tregut të eksporteve me Arabinë Saudite, ku në fakt është punuar dy vjet për tu licensuar vetëm një subjekt për këtë qëllim dhe ngarkesa e parë ishte 43 krerë qingja, një ngarkëse kjo simbolike që nuk ka asnjë vlerë të shtuar në tregun e eksporteve të mishit.

Por edhe nëse në tërësi është një lajm i mirë hapja me një treg të ri, kapacitetet e blegtorisë shqiptare për të eksportuar janë shumë të ulëta, duke marë parasysh trendin rënës të mbarështimit, mospërballimin e konsumit vendas por edhe emigrimin e fuqisë punëtore.

Në këtë pikë, lajm të mirë do të përbënte zgjerimi i fermave,  rritja e potencialit eksportues, plotësimi i kritereve të sigurisë, çka automatikisht do të hapnin dyert e shumë shteteve për blegtorët shqiptarë.

Elisabeta Dosku / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.