Tregjet e aksioneve zgjerojnë humbjet – Investitorët, të shqetësuar për ngadalësimin e ekonomisë

Bursat europiane janë hapur në rënie edhe në sesionin e sotëm, duke zgjeruar humbjet e një dite më parë. Investitorët janë të shqetësuar për ngadalësimin e ekonomisë globale dhe po presin të dhënat mbi inflacionin në Shtetet e Bashkuara të Amerikës. Indeksi pan-Europian Stoxx 600 po qëndron në rënie të lehtë me 0.4%, me shumicën e sektorëve që janë hapur në territor negativ.

Indeksi i Çmimeve Konsumatore në SHBA parashikohet të jetë rritur edhe më tej, nga niveli prej 8.6% që ishte në maj. Gjithsesi, të dhënat mbi punësimin në SHBA, që rezultuan më mirë se parashikimet e analistëve, sugjerojnë se ekonomia më e madhe në botë nuk e ka arritur ende pikën e shqetësimit.

Por, raporti mbi punësimin, megjithëse i mirë për ekonominë, mund t’a inkurajojë Rezervën Federale të vijojë me politikën agresive të rritjes së interesave, për të luftuar inflacionin e lartë. Njëkohësisht, investitorët po presin edhe fitimet tremujore të korporatave më të mëdha amerikane.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.