Tregjet europiane i rikthehen rritjes – Investitorët presin takimet e bankave qendrore dhe fitimet e korporatave

Bursat europiane i janë rikthyer fitimeve në sesionin e sotëm, ndërsa investitorët po presin takimin e Rezervës Federale, në mbrëmjen e sotme. Gjithashtu, të enjten do të marrin vendimet e tyre mbi politikat monetare edhe Banka Qendrore Europiane dhe Banka e Anglisë.

Indeksi pan-Europian Stoxx 600 e ka nisur ditën në rritje me 0.25%, ndërsa gjatë janarit ky indeks fitoi rreth 6.7% të vlerës. Investitorët presin gjerësisht se Rezerva Federale do të rrisë normën bazë të interesit me 25 pikë bazë, por do të monitorojnë komentet e shefit të bankës qendrore, Jerome Powell mbi gjendjen e ekonomisë.

Edhe shumica e tregjeve aziatike patën një tendencë në rritje. Muaji i parë i vitit 2023 ka qenë pozitiv për tregjet e aksioneve, për shkak të largimit të shqetësimeve se ekonomia mund të shkojë drejt recesionit. Investitorët do të jenë të fokusuar edhe te fitimet tremujore të korporatave.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.