Tregjet europiane, në rënie – Putin njofton mobilizimin e popullit për të luftuar në Ukrainë

Tregjet europiane janë hapur në rënie të lehtë në sesionin e sotëm, pasi investitorët në rajon po përgatitet për një tjetër rritje agresive të normave të interesit nga Rezerva Federale. Indeksi pan-Europian Stoxx 600 e ka nisur ditën në rënie me rreth 0.4%, ndërsa sektori i udhëtimeve realizon humbjet më të mëdha, në rënie me 1.4%.

Rritja e inflacionit me 8.3% gjatë gushtit në SHBA pritet të detyrojë bankën qëndrore të rrisë normën bazë të interesit minimalisht me 75 pikë bazë, pë të ftohur inflacionin. Edhe tregjet aziatike u mbyllën në rënie në sesionin e sotëm, duke ndjekur tendencën po në rënie të Wall Street.

Në fokus të tregjeve do të jetë edhe konflikti në Ukrainë, pasi presidenti rus, Vladimir Putin, njoftoi një mobilizim të pjesshëm ushtarak në Rusi, duke i futur njerëzit dhe ekonominë në një situatë lufte, ndërkohë që vijon pushtimi i Ukrainës.

Në një fjalim të regjistruar në televizion, Putin tha se perëndimi dëshiron t’a shkatërrojë Rusinë, ndërsa popullin e Ukrainës ta kthejë në “mish për top”. Putin tha se mobilizimi i popullit do të fillojë të mërkurën, por pa dhënë më shumë detaje.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.