Tregjet europiane, në rritje modeste – Fitimet kufizohen nga rritja e infektimeve me Covid-19 në Kinë

Tregjet europiane po qëndrojnë në rritje të lehtë në sesionin e sotëm, por fitimet po kufizohen nga shqetësimet që kanë të bëjnë me ngadalësimin e ekonomisë globale, sidomos pas shpërthimit të vatrave të reja me Covid-19 në Kinë.

Indeksi pan-Europian Stoxx 600 e ka nisur ditën në rritje me 0.3%, ndërsa sektori i naftës dhe gazit realizon fitimet më të mëdha, në rritje me mbi 3%. Investitorët po monitorojnë nga afër të dhënat ekonomike për të parashikuar më saktë trajektoren e politikave monetare të bankave qëndrore.

Edhe shumica e tregjeve në rajonin e Azi-Paqësorit patën ndryshime të vogla, ndërsa qeveria kineze vijon të zbatojë politikën zero-Covid. Tregjet po presin edhe të dhënat mbi besimin konsumator në Eurozonë për muajin nëntor, që do të japin një panoramë më të qartë mbi gjendjen e familjeve në bllok.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.