Tregjet globale, në rritje drastike – Mbështeten nga lajmet se qeveria britanike do të rishikojë uljen e taksave

Bursat europiane po qëndrojnë në rritje në sesionin e fundit të kësaj jave, dhe po mbështeten nga spekulimet se qeveria britanike mund ta rishikojë planin e saj të uljes së taksave. Indeksi pan-Europian, Stoxx 600 e ka nisur ditën në rritje me 1.7%, ndërsa sektori i lëndëve të para realizon fitimet më të mëdha me 2.7%.

Sesioni i së enjtes ka qënë shumë i paqëndrueshëm për tregjet globale, sidomos pas publikimit të të dhënave mbi inflacionin në SHBA. Por, në mbyllje të tregtisë, si Wall Street ashtu edhe bursat aziatike u rritën ndjeshëm. Ditën e sotme, Banka e Anglisë duhet të mbyllë programin e blerjes së bonove, por sipas informacioneve ky program mund të shtyhet përtej këtij afati.

Ndërhyrja e Bankës së Anglisë shmangu një kolaps në tregun e fondeve private të pensioneve, që ndikoi edhe në forcimin e paundit britanik. Por, sipas analistëve rritja e monedhës britanike mund të jetë e përkohshme.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.