Tregu europian i teknologjisë, 1.1 trilion dollarë – Përkundrejt klimës së pafavorshme do të rritet me 4% këtë vit

Tregu europian i teknologjisë së informacionit dhe komunikimit vazhdon të demonstrojë rezistencë ndaj paqëndrueshmërisë gjeopolitike dhe pasigurisë ekonomike. Përkundrejt klimës së pafavorshme, vlera e këtij tregu në Europë pritet të arrijë në 1.1 trilion dollarë në vitin 2022. Kjo performancë do të thotë se, pavarësisht presioneve inflacioniste, luftës në Ukrainë dhe mungesës së punonjësve, tregu europian i teknologjisë së informacionit dhe komunikimit do të rritet me 4% këtë vit. Sipas vlerësimeve të Korporatës Ndërkombëtare të të Dhënave (IDC), tregu në Europë do të mbetet në një trajektore rritëse në vitet e ardhshme.

Autorët e raportit vlerësojnë se vlera e tregut të teknologjisë së informacionit dhe komunikimit do të arrijë në 1.4 trilion dollarë në vitin 2026, që përkthehet në një normë mesatare vjetore rritjeje prej 5% në periudhën 2021-2026. Investimi në softuer do të jetë karta e fortë e tregut në vitin 2022, me softuerin që do të jetë sektori i teknologjisë me rritjen më të shpejtë në bazë vjetore, i mbështetur nga platformat e inteligjencës artificiale dhe natyrisht cloud. I ndihmuar nga investimet në renë kompjuterike, tregu i softuerit do të mbetet elastik, ndryshe nga sektori i harduerit, që pritet të bjerë në vlerë me 0.1% këtë vit. Sipas analistëve, presionet inflacioniste, recesioni i pritshëm dhe lufta Rusi-Ukrainë po reduktojnë kërkesën për pajisje në Europë.

Sektori i konsumit, banka dhe prodhimi do të jenë ndër investitorët kryesorë në shpenzimet e teknologjisë së informacionit dhe komunikimit, duke thithur pothuajse 46% të investimeve totale të teknologjisë në vitin 2022. “Europa është prekur nga ndërprerjet e zinxhirit të furnizimit, shumë prej të cilave janë të lidhura me luftën në Ukrainë. Kjo po prek shumë industri, të cilat po i drejtohen automatizimit për të optimizuar proceset dhe minimizuar ndërprerjet”, komentojnë analistët e kompanisë.

Shumë kompani në Europë, si dhe në mbarë botën, do të investojnë në teknologji me synimin për të reduktuar presionin mbi stafin ekzistues, për të automatizuar proceset dhe reduktuar mbështetjen e tyre në punën njerëzore aty ku burimet njerëzore nuk janë të disponueshme. Megjithatë, tregu rus i teknologjisë, nuk do të ndjekë trendin e përgjithshëm pozitiv të tregut europian. Për Rusinë, analistët parashikojnë se shpenzimet e teknologjisë do të ulen me 23% në vitin 2022. Kjo do të ndodhë për shkak të një rënie të ndjeshme të shpenzimeve për harduer, lidhur me largimin e shumë kompanive të sektorit nga Rusia. Megjithatë, shërbimet softuerike dhe IT do të vazhdojnë të rriten edhe në tregun rus.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.