Tregu i naftës, i qëndrueshëm – Ndërpritet përkohësisht furnizimi nëpërmjet tubacionit Druzhba
Nafta po shfaqet e qëndrueshme në sesionin e sotëm, me tendencë në rënie të lehtë, ndërkohë që rastet me Covid-19 në Kinë vijojnë të rriten, duke detyruar autoritetet të vendosin kufizime. Kina është importuesja më e madhe e naftës në botë dhe çdo kufizim përkthehen në një kërkesë më të ulët.
Nafta Brent e Londrës po tregtohet në rreth 93 dollarë për fuçi, ndërsa nafta Bruto amerikane po tregtohet në rreth 86 dollarë për fuçi. Gjatë sesionit të kaluar amerikan, çmimet e naftës u rritën ndjeshëm, pasi furnizimi në Europën Qendrore dhe Lindore, nëpërmjet tubacionit Druzhba u pezullua përkohësisht. Ndërprerja erdhi njëkohësisht me shpërthimet në një fshat në Poloninë lindore, pranë kufirit me Ukrainën, ku dy persona gjetën vdekjen.
Këto sulme, që dyshohet se u kryen nga Rusia, mund të detyrojnë vendet perëndimore të shtojnë sanksionet ndaj Moskës. Gjithashtu, ekziston frika se konflikti në Ukrainë mund të përhapet edhe në vende të tjera. Në Kinë, rritja e infektimeve me Covid-19 po dëmton kërkesën, pavarësisht lehtësimit të protokollit të karantinës gjatë fundjavës. Për këtë arsye, Agjencia Ndërkombëtare e Energjisë uli parashikimin për rritjen e kërkesës për naftë, në 1.6 milionë fuçi në ditë, gjatë vitit 2023.
SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.