Turizmi ndihmon ekonominë në Greqinë – Një performancë e papritur e mirë e sektorit është regjistruar këtë vit

Turizmi po rezulton faktori kryesor që kompenson efektet në ekonominë greke nga kriza globale e energjisë dhe inflacionit, pasi rimëkëmbja dinamike e tij këtë vit, ndoshta në nivele 10% më të larta se viti rekord i 2019, po krijon pritshmëri për rritje më të larta se sa pritej.

Vlerësimet për përfitimet dytësore, indirekte nga turizmi në sektorë të tjerë të ekonomisë, flasin për 52.89 miliardë euro shtesë në vlerë për produktin e brendshëm bruto këtë vit. E gjithë kjo, natyrisht, është vetëm me kusht që të mos shfaqen ngjarje negative të paparashikueshme që mund të ndikojnë negativisht në turizëm.

Kjo shumë prej 52.89 miliardë euro, që korrespondon me rreth 28% të PBB-së së parashikuar në vitin 2022, rrjedh nga shumëzuesi prej 2.65 që ekonomistët i caktojnë turizmit dhe rritja e vlerësuar e të ardhurave të udhëtimit këtë vit në 20 miliardë euro, nga 18.2 miliardë euro në vitin 2019.

Këto vlerësime janë mbështetur edhe nga firma të mëdha si HSBC dhe Bank of America, ku e para ka përmirësuar parashikimin e rritjes së ekonomisë greke këtë vit në 6.5% nga 4% më parë, ndërsa kjo e fundit flet për një efekt të rëndësishëm pozitiv.

Arsyetimi i faktorit shumëzues 2.65 është i thjeshtë: çdo hotel shpenzon një pjesë të madhe të parave që mbledh për pagat, gjë që rrit të ardhurat e disponueshme të familjes që shpenzohen edhe në ekonomi. Në të njëjtën kohë, rritja e të ardhurve krijon nevoja për staf shtesë, duke nxitur kështu punësimin. Përveç kësaj, shpenzimet e hoteleve për furnizime, nga ushqimi dhe pijet te karburantet dhe energjia elektrike, dhe nga mirëmbajtja te transporti, rrit të ardhurat e industrive të tjera etj. Udhëtarët shpenzojnë para edhe jashtë hoteleve, ndërkohë që “bumi” i përgjithshëm në këtë sektor mobilizon edhe investime të reja, duke fuqizuar sektorët e ndërtimit dhe të tjerë.

Hulumtimi nga Grant Thornton dhe Dhoma Greke e Hoteleve tregon se përfitimet e turizmit janë të shpërndara në 17 degë të aktivitetit ekonomik dhe nëntë sektorë të ekonomisë greke, duke përfshirë sektorin primar, prodhimin, tregtinë me shumicë dhe pakicë, transportin, logjistikën etj.

SCAN

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.