Turqia regjistron 28 miliardë dollarë hyrje nga origjina të paqarta në 8 muajt e parë të vitit – Ministri i financave: Një pjesë e tyre ishin para legjitime nga pushuesit rusë!

Një rekord prej 28 miliardë dollarë parash nga origjina të paqartë kanë hyrë në Turqi midis janarit dhe gushtit të këtij viti, raportoi të martën Financial Times. Ministri i financave i Turqisë, megjithatë, i ka minimizuar këto shqetësime.

Ministri turk i financave Nureddin Nebati i tha FT se ai besonte se “të ardhurat e pallogaritura për turizëm” ishin një pjesë kyçe e flukseve të tilla neto, të cilat kategorizohen si “gabime dhe lëshime neto” nga banka qendrore turke nën llogaritë e Bilancit të Pagesave, raportoi FT.

Një pjesë e parave erdhën nga turistët rusë të cilët duhej të përdornin para të gatshme, pasi nuk ishin në gjendje të hynin në sistemet e pagesave financiare ndërkombëtare për shkak të sanksioneve, tha ai për median.

Nebati tha për FT se marrëdhëniet e Turqisë dhe Rusisë janë thjesht “marrëdhënie të mira fqinjësore”.

Rusët kanë qenë grupi i dytë më i madh i vizitorëve të huaj në Turqi deri më tani, duke përbërë rreth 13% të totalit të vizitorëve, sipas Ministrisë Turke të Kulturës dhe Turizmit. Gjermanët kanë qenë grupi më i madh i udhëtarëve të huaj në Turqi në tetë muajt e parë të vitit.

Nebati gjithashtu ia atribuoi disa nga flukset hyrëse të pakategorizuara kompanive dhe individëve turq, të cilët riatdhesuan paratë – disa herë në para të gatshme – në vendin e tyre, sipas FT.

Ai shtoi se të gjitha hyrjet ishin legjitime, duke shtuar se Turqia “vepron me shumë kujdes brenda sistemit financiar ndërkombëtar. Nuk është një vend që sillet në mënyra që do të shkaktojnë shkelje të sistemit financiar ndërkombëtar”.

Flukset e mistershme hyrëse në Turqi nuk janë të reja, por ato po vihen nën vëzhgim në rritje ndërsa Ankaraja dhe Moska po afrohen më tej. Javën e kaluar, presidenti turk Rexhep Tajip Erdogan tha se vendi i tij do të punojë me Rusinë për të krijuar një “qendër të gazit natyror”, raportoi Anadolu Agency e Turqisë.

Edel Strazimiri / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.