Turqia rrit pagën minimale mujore – Me 55% për vitin 2023. Punëdhënësit, kundër: Shtohen kostot, largohen klientët e huaj

Paga minimale mujore në Turqi do të jetë 455 dollarë në vitin 2023, duke pësuar një rritje prej 55% nga niveli i përcaktuar në korrik. Duke folur në një konferencë për mediat, presidenti Tajip Erdogan tha se paga minimale mund të rritet përsëri gjatë gjithë vitit nëse është e nevojshme. Inflacioni vjetor u rrit mbi 85% në muajt e fundit, por ka filluar të zbutet lehtë.

Erdogan tha se sindikatat e punëdhënësve dhe punonjësve nuk mund të arrinin një marrëveshje dhe qeveria ndërhyri për të përcaktuar rritjen.

Rritja e fundit e pagës minimale ka shkaktuar shqetësim tek bizneset në Turqi pasi do të rriste koston për punëdhënësit.

Sipas tyre, pas rritjes së fundit, kosto e pagës minimale për punëdhënësit tani është 630 dollarë, ndërsa më parë ishte 410 dollarë. Punëdhënësit shprehen se me këtë rritje të re është e pamundur që të mbahen në të njëjtin nivel çmimet e produkteve.

Në këtë mënyrë, klientët globalë të bizneseve turke do të preferojnë vende të tjera për prodhim për shkak të rritjes së kostove në Turqi.

Drejtues të shoqatave të punëdhënësve theksojnë se ata nuk mund të konkurrojnë me vende si Bangladeshi, Vietnami, India, apo Kamboxhia dhe në këtë mënyrë do të humbasin klientët. Ndërsa, nga ana tjetër do të rezultojë në shkurtime të vendeve të punës. Sipas përllogatitjeve, nga rritja e re e pagës minimale sektori i tekstilit pritej të humbiste 10% të fuqisë punëtore.

Dorian Koça / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.