Ujësjellësit, çmim të favorshëm për energjinë – KESH ia shet më lirë OSHEE-së, pasi 51% e aksioneve i kaluan Ministrisë së Energjisë

Ndërmarrjet e ujësjellësve, që furnizohen nga OSHEE nën rolin e Furnizuesit të Mundësisë së Fundit, do e pagujnë më lirë energjinë elektrike gjatë vitit 2023. Pas, reformës që i kaloi 51% të aksioneve Ministrisë së Infrastrukturës dhe Energjisë, Korporata Elektroenergjetike Shqiptare ka vendosur t’i shesë më lirë energjisë OSHEE-së, çka ka sjellë një rënie të çmimit final.

Sipas vendimit të Entit Rregullator të Energjisë, ujësjellësit e lidhur në tensionin 35 KV do e paguajnë energjinë elektrike me 9.33 lekë/kWh, ndërsa të lidhurit në tensionin 20, 10 dhe 6 KV do e pagujanë 11.77 lekë/kWh. Deri më tani këta të fundit e pagunin me 18.8 lekë/kWh, ndërsa ato ndërmarrje që janë të lidhura në tensionin 35 KV e paguanin me çmime që shkonin mbi 30 lekë/kWh.

Mbetet e paqartë se përse është vendosur ky favorizim për kompanitë e ujësjellësve, por ajo që vlen të theksohet është se këta abonentë janë në proces ristrukturimi për shkak të reformës në sektorin e ujit, që do të sjellë bashkimin e tyre në 15 kompani, nga 58 që ishin deri më tani.

Po ashtu, aksioner maxhoritar do të jetë MIE, ndërsa pjesa tjetër do të ndahet midis ujësjellësve. Ndërkaq, këto kompani regjistrojnë një nivel të lartë borxhesh për fatura të palikujduara të energjisë elektrike. Sipas të dhënave zyrtare, deri në fund të 8-mujorit 2022, borxhi i abonentëve jobuxhetorë, ku kryesisht futen ujësjellësit arriti në 18 mld lekë.

Ola Mitre / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.