Ulet parashikimi për ekonominë greke – Rritja e pritshme u reduktua për shkak të stanjacionit në eurozonë

Kristi Ceta/SCAN

 

Greqia ka shkurtuar parashikimin e saj për rritjen ekonomike të vitit 2024 për herë të dytë këtë vit në 2.2%, pasi stanjacioni në vendet e eurozonës godet investimet dhe eksportet, tha këshilli fiskal i vendit, duke cituar një plan ekonomik të qeverisë.

Greqia projektoi rritje prej 2.9% në fillim të vitit, pasi vendi vazhdoi të dilte nga një krizë borxhi prej një dekade që gati e kushtëzoi të dilte nga eurozona. Parashikimi u ul në 2.5% në prill, gjithashtu për shkak të një ngadalësimi më të gjerë të BE-së.

“Parashikimet e vitit 2024 bazohen në të dhënat për rritjen e dobët të ekonomisë evropiane në dy tremujorët e parë të 2024, veçanërisht për partnerët kryesorë tregtarë të vendit, si Gjermania”, thuhet në një deklaratë të këshillit.

Më shumë se gjysma e investimeve të huaja direkte në Greqi vijnë nga vendet e Evropës veriore, ndërsa dy të tretat e eksporteve të vendit, si mallrat bujqësore, karburantet dhe produktet farmaceutike, shkojnë në Bashkimin Evropian.

Këshilli, një organ këshillimor, tha se qeveria gjithashtu shkurtoi vlerësimin e saj të rritjes për vitin 2025 në 2.3% nga 2.5% që ishte më parë, shumë mbi mesataren e eurozonës.

Në periudhën afatmesme, ngjarjet e lidhura me ndryshimet klimatike, duke përfshirë përmbytjet dhe zjarret, do të dëmtojnë rritjen ekonomike, theksoi këshilli.

“Fatkeqësitë natyrore, të cilat shpesh çojnë në kosto të jashtëzakonshme, mund të hedhin dyshime mbi dinamikën e rritjes së ekonomisë greke në vitet e ardhshme,” u shprehën anëtarët.

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.