Ulja e prodhimit të naftës, në interes ë tregut – Ekspertët e Arabisë Saudite mbrojnë vendimin e OPEC+. Reagimi i Biden, i pajustifikuar

Reagimi i presidentit të SHBA, Joe Biden, ndaj vendimit të OPEC+ për të ulur prodhimin e naftës nuk është i justifikuar, deklaroi konsulenti financiar dhe ekonomik saudit, Majid Al-Suwaigh. Sipas tij, ishte “në interes të tregut” të kufizohej prodhimi i naftës në këtë periudhë.

Ai shtoi se të gjithë anëtarët e OPEC ranë dakord për vendimin dhe se rritja e çmimit të naftës ishte rezultat i ofertës dhe kërkesës. Eksperti saudit tha se reagimi i Shtëpisë së Bardhë vjen nga dështimi i SHBA-së dhe Europës për të kontrolluar inflacionin.

Presidenti Joe Biden deklaroi të martën se do të kishte “pasoja” për marrëdhëniet e SHBA me Arabinë Saudite pas vendimit. Njoftimi i tij erdhi një ditë pasi senatori i fuqishëm demokrat Bob Menendez, kryetar i Komitetit të Senatit për Marrëdhëniet me Jashtë, tha se Shtetet e Bashkuara duhet të ngrijnë menjëherë të gjithë bashkëpunimin me Arabinë Saudite, përfshirë shitjen e armëve.

Qytetarët sauditë thanë se nuk ishin të befasuar nga reagimi i SHBA-së ndaj vendimit të OPEC+, që njoftoi uljen e prodhimit pas javësh lobimi nga zyrtarët amerikanë kundër një lëvizjeje të tillë.

Shtetet e Bashkuara akuzuan Arabinë Saudite për bashkëpunim me Rusinë, e cila kundërshton një kufizim perëndimor mbi çmimin e naftës ruse në përgjigje të pushtimit të Ukrainës. Zyrtarët amerikanë ishin përpjekur të bindin partnerin e tyre më të madh arab që të braktiste idenë e një shkurtimi të prodhimit, por sundimtari de fakto i Arabisë Saudite, Princi i Kurorës Mohammed bin Salman, nuk u lëkund.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.