Vendet europiane ku pronarët e shtëpive duhet të jenë më të shqetësuar për ndryshimet klimatike!

2022 e ka sjellë krizën klimatike në shtëpitë e europianëve si asnjë vit tjetër. Mund të jetë një ‘imazh’ i normalitetit të ri, thonë studiuesit pas një studimi të ri që tregon se sezoni i zjarrit arriti  ‘zona të djegura’ rekord në disa rajone të Europës Jugperëndimore.

Kontinenti gjithashtu ka pësuar thatësirën më të keqe në 500 vjet këtë verë, e ndjekur nga përmbytje të rrezikshme në disa vende. Dhe më shumë të dhëna po derdhen për numrin vdekjeprurës të këtij moti ekstrem. Autoritetet franceze, për shembull, sapo kanë vlerësuar se valët e të nxehtit të vitit shkaktuan mbi 2,816 vdekje.

Përveç rrezikut për jetën, njerëzit janë gjithnjë e më të shqetësuar për shtëpitë e tyre. Duke pasur parasysh ndikimin e mundshëm në industrinë e sigurimeve, faqja e krahasimit në Mbretërinë e Bashkuar ComparetheMarket ka hartuar një listë të 10 vendeve europiane ku shtëpitë janë më të cenueshme.

Spanja kryeson listën e vendeve më të cenueshme nga klima, duke humbur 1,694 hektarë tokë nga zjarret në vit, sipas llogaritjeve të analistëve. Ata shikuan një sërë faktorësh për t’i dhënë secilit vend një rezultat të përgjithshëm klimatik dhe Spanja u shty gjithashtu në krye të listës nga nivelet e saj të ndotjes së ajrit.

Por është Portugalia ajo që vuan më shumë nga zjarret, me një mesatare prej 2,444 hektarësh të djegur në vit. Në mënyrë të pashmangshme, disa shtëpi janë në zona me rrezik të lartë.

Serbia është vendi europian më i rrezikuar nga përmbytjet e shkaktuara nga reshjet e dendura të shiut me një mesatare prej 1.4 përmbytjesh të shkaktuara nga rreshjet në vit. Kjo e bën atë vendin numër një për dëmet e shtëpive të lidhura me përmbytjet.

Në përgjithësi, Bosnja dhe Hercegovina u rendit e dyta në listën e ComparetheMarket, për shkak të numrit të lartë të zjarreve dhe përmbytjeve.

Dhe Britania e Madhe doli e treta, e goditur nga cilësia e dobët e ajrit dhe niveli i lartë i ndotjes.

Edel Strazimiri / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.