Vendi i parë në Evropë – Mali i Zi fiton 46.4 milionë euro nga eksporti i energjisë elektrike në tre javë

Ndërmarrja shtetërore e energjisë Elektroprivreda Crne Gore (EPCG) ka fituar 46.4 milionë euro nga eksporti i energjisë elektrike gjatë tre javëve të fundit, tha Milutin Gjukanoviç, kryetar i Bordit të Drejtorëve të EPCG. Gjithashtu, më 9 dhjetor, Mali i Zi kishte peshën më të madhe të energjisë së erës në Evropë në prodhimin vendas të energjisë elektrike.

Thatësira dhe nivelet e ulëta të ujit detyruan EPCG të importojë një sasi më të madhe të energjisë elektrike se zakonisht në tre tremujorët e parë të vitit 2022 dhe me çmime të larta, për shkak të krizës energjetike. Rezultati ishte një humbje prej 57 milionë eurosh. Megjithatë, me reshjet e fundit, nivelet e ujit u përmirësuan dhe kompania filloi eksportin e energjisë elektrike.

Nga 21 nëntori deri më 11 dhjetor, EPC ka fituar 46.4 milionë euro nga eksportet e energjisë elektrike, tha Gjukanoviç.

Në raportet e tij, Instituti Hidrometeorologjik tha se një thatësirë e rëndë hidrologjike u regjistrua në Mal të Zi që nga vjeshta e vitit të kaluar dhe se ishte ekstreme në perëndim të vendit, ku ndodhen dy hidrocentralet e mëdha të EPCG, Perućica dhe Piva.

Vlen të përmendet se HEC-et përbëjnë rreth 45% të prodhimit vendas të energjisë kur nivelet e ujit janë të rregullta.

Sipas një analize të Ministrisë së Investimeve Kapitale, EPCG importoi energji elektrike me një çmim mesatar prej rreth 281 euro për MWh në tetë muajt e parë të vitit 2022, që është rreth 260% më i lartë se në të njëjtën periudhë të vitit të kaluar, kur çmimi ishte rreth 78 euro.

Vendi i parë në Evropë

Një lajm tjetër i mirë nga sistemi elektroenergjetik i Malit të Zi ishte rritja e prodhimit në fermat e erës Kërnovë, me kapacitet 72 MW dhe Mozhura, me kapacitet 46 MW.

Shoqata WindEurope njoftoi se më 9 dhjetor pjesa e erës në prodhimin e energjisë elektrike në Mal të Zi ishte më e larta në të gjithë Evropën – 34%. Kroacia ishte në vendin e dytë, pas Greqisë.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.