Xiaomi “infektohet” nga COVID-19! – Rikthimi i pandemisë në Kinë detyron kompaninë të shkurtojë 10% vende pune
Korporata kineze Xiaomi ka filluar të pushojë nga puna anëtarë të stafit të sektorit të prodhimit të telefonave celulare dhe shërbimeve të internetit, duke iu bashkuar një liste të gjatë të firmave kineze të teknologjisë që shkurtojnë vendet e punës në një kohë që vendi po përballet me një valë infektimesh me Covid 19.
Një zëdhënës i kompanisë u shpreh se praktika për optimizimin e personelit dhe riorganizimin do të prekte më pak se 10% të fuqisë totale punëtore, duke shtuar se të prekurit janë kompensuar në përputhje me rregulloren.
Mediat kineze raportuan se shkurtimi i vendeve të punës do të prekte 15% të të punësuarëve të Xiaomi. Shumë kompani të mëdha teknologjike në Kinë, kanë reduktuar stafet e tyre muajt e fundit pasi vendi u zhyt në një betejë të gjatë kundër Covid.
Xiaomi regjistronte 35.314 anëtarë stafi që nga 30 shtatori, sipas South China Morning Post, me mbi 32 mijë në territorin e Kinës. Lëvizja e fundit mund të prekë mijëra punëtorë, shumë prej të cilëve sapo i janë bashkuar kompanisë gjatë një fushate punësimi që filloi në dhjetor të vitit të kaluar.
Xiaomi në nëntor raportoi një rënie prej 9.7% në të ardhurat e tremujorit të tretë, si pasojë e goditjeve nga kufizimet e Kinës për COVID-19 dhe zbutja e kërkesës së konsumatorëve. Të ardhurat nga telefonat celulkarë, të cilët përbëjnë afërsisht 60% të shitjeve totale të saj, ranë me 11% nga viti në vit, sipas shifrave të konfirmuara nga Xiaomi.
Dorina Kurtaj / SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.